
విజయ్ ఆంటోని ప్రధాన పాత్రలో వచ్చిన బిచ్చగాడు సినిమా ఎంత హిట్ అయిందో తెలిసిందే. 2016 లో ఎలాంటి అంచనాలు లేకుండా వచ్చిన ఈసినిమా తమిళ్, తెలుగులో కూడా బ్లాక్ బస్టర్ హిట్ ను సొంతం చేసుకుంది. ఇక ఈసినిమాతో విజయ్ ఆంటోని కూడా ప్రత్యేకమైన క్రేజ్ ను సొంతం చేసుకున్నాడు. ఇక ఇప్పుడు ఈసినిమాకు సీక్వెల్ వస్తున్న సంగతి తెలిసిందే కదా. ఈసినిమాకు విజయ్ ఆంటోనినే దర్శకత్వం వహించబోతున్నారు. నిజానికి ఈ సినిమా ఏప్రిల్ 14న విడుదల కావాల్సి ఉండగా మే 19కి వాయిదా పడింది.
ఇక ఈసినిమా రిలీజ్ డేట్ దగ్గర పడుతున్న నేపథ్యంలో చిత్రయూనిట్ ప్రమోషన్ కార్యక్రమాలతో బిజీగా ఉంది. ఇప్పటికే రిలీజ్ చేసిన పోస్టర్లు, టీజర్ సినిమాపై అంచనాలను పెంచాయి. ఇక తాజాగా ఈసినిమా ట్రైలర్ ను రిలీజ్ చేశారు మేకర్స్. ట్రైలర్ చూస్తుంటే బ్రైయిన్ ట్రాన్స్ ప్లాంటేషన్ నేపథ్యంలో ఈసినిమా వస్తున్నట్టు అర్థమవుతుంది. ఇండియాలో ఉన్న ధనవంతుల్లో ఒకడైన విజయ్ గురమూర్తిని పరిచయం చేస్తూ ఈ ట్రైలర్ మొదలవుతుంది. అయితే అతను హత్యకు గరవుతాడు. ట్విస్ట్ ఏంటంటే విజయ్ గురుమూర్తిలా ఉండే సత్య అనే వ్యక్తి ఈ హత్య కేసులో ప్రధాన నిందితుడు అవుతాడు. మొత్తానికి థ్రిల్లింగ్, యాక్షన్, గ్రాండ్ విజువల్స్ తో కూడిన ట్రైలర్ అయితే ఆకట్టుకుంటుంది. ఇక బ్యాక్ గ్రౌండ్ స్కోర్ కూడా అదిరిపోయే రేంజ్ లో ఇచ్చాడు విజయ్ ఆంటోని. ట్రైలర్ చూస్తుంటే బిచ్చగాడు 2తో విజయ్ మరోసారి తన మార్క్ చూపించేటట్లు కనిపిస్తున్నారు.
ఈసినిమాలో కావ్య థాపర్ హీరోయిన్ గా నటిస్తుండగా.. దేవ్ గిల్, హరీష్ పెరడి, జాన్ విజయ్, రాధా రవి, మన్సూర్ అలీ ఖాన్, వైజీ మహేంద్రన్, రాజా కృష్ణమూర్తి తదితరులు ఇతర కీలక పాత్రల్లో నటిస్తున్నారు. ఈ చిత్రానికి సినిమాటోగ్రఫీ ఓం నారాయణన్ అందిస్తున్నారు. సంగీతాన్ని కూడా విజయ్ ఆంటోని అందిస్తున్నారు. ఇక ఫాతిమా విజయ్ ఆంటోని 'విజయ్ ఆంటోని ఫిల్మ్ కార్పొరేషన్' పతాకంపై ఈ ప్రాజెక్టును నిర్మించనున్నారు. తమిళంతో పాటు తెలుగులో ఒకేసారి ఈసినిమాను విడుదల చేయనున్నారు.







