బాల‌య్య‌ కెరీర్‌లో ఫ‌స్ట్ టైమ్

నంద‌మూరి బాల‌కృష్ణ‌కు అచ్చొచ్చిన సీజ‌న్స్‌లో సంక్రాంతి ఒక‌టి. సంక్రాంతి టైంలో వ‌చ్చిన ప‌లు బాల‌య్య చిత్రాలు రికార్డు స్థాయి విజ‌యాలు అందుకున్నాయి. అందుకే… అవ‌కాశం దొరికిన‌ప్పుడ‌ల్లా వ‌రుస‌గా అదే సీజ‌న్‌లో త‌న చిత్రాల‌తో ప‌ల‌క‌రిస్తున్నాడు ఈ సీనియ‌ర్ హీరో.

‘డిక్టేటర్’(2016), ‘గౌతమిపుత్ర శాతకర్ణి’(2017), ‘జై సింహా’(2018), ‘యన్టీఆర్ కథానాయకుడు’(2019)… ఇలా నాలుగేళ్ళుగా సంక్రాంతి సీజ‌న్‌లో త‌న సినిమాల‌తో సంద‌డి చేస్తున్న బాల‌య్య‌… 2020 సంక్రాంతికి కె.ఎస్.రవికుమార్ డైరెక్షన్‌లో తెరకెక్కుతున్న ‘క్రాంతి’ (ప్ర‌చారంలో ఉన్న పేరు)తో ఐదోసారి వ‌రుస‌గా అదే సీజ‌న్‌లో ప‌ల‌క‌రించ‌బోతున్నాడు. ఆస‌క్తిక‌ర‌మైన విష‌య‌మేమిటంటే… త‌న కెరీర్‌లో ఇప్ప‌టివ‌ర‌కు ఐదేళ్ళ‌పాటు వ‌రుస‌ సంక్రాంతి రిలీజ్‌ల‌తో బాల‌య్య సంద‌డి చేసిన సంద‌ర్భం లేదు. ఇదే తొలిసారి.

గ‌తంలో య‌న్టీఆర్‌, ఏయ‌న్నార్‌, కృష్ణ‌, శోభ‌న్ బాబు, చిరంజీవి వంటి అగ్ర క‌థానాయ‌కులు మాత్ర‌మే ఇలా ఐదు లేదా అంత‌కుమించి వ‌రుస సంవ‌త్స‌రాల‌లో సంక్రాంతి వినోదాలు అందించారు. ఇప్పుడు ఈ జాబితాలో బాల‌య్య చేరుతుండ‌డం ఆస‌క్తిక‌రం.