రాధేశ్యామ్ రివ్యూ.. ఆర్టిస్టిక్ అండ్ విజువల్ వండర్..!

రాధాకృష్ణ దర్శకత్వంలో ప్రభాస్, పూజాహెగ్డే జంటగా నటించిన సినిమా రాధేశ్యామ్. ఈసినిమా కోసం దేశం మొత్తం ఆసక్తిగా ఎదురుచూస్తుంది. ఇక ఎన్నో రోజుల నుండి ఎదురుచూస్తున్న ప్రభాస్ ఫ్యాన్స్ కోరిక నేటితో తీరిపోయింది. ఈసినిమా నేడు ప్రేక్షకుల ముందుకు వచ్చింది. మరి ఈసినిమా ప్రారంభం నుండే భారీ అంచనాలు ఉన్నాయి ఈసినిమా మీద. దానికి తోడు పాటలు, టీజర్, ట్రైలర్ లతో సినిమాపై భారీ హైప్ క్రియేట్ చేశారు. మరి ఈసినిమా ఎలా ఉంది.. భారీ అంచనాలను ఈసినిమా రీచ్ అయిందా లేదా అన్నది తెలియాలంటే రివ్యూలోకి వెళ్లాల్సిందే.

నటీనటులు.. ప్రభాస్, పూజా హెగ్డే, భాగ్యశ్రీ, కృష్ణంరాజు, సచిన్ ఖేడేకర్‌, ప్రియదర్శి, రిద్ధి కుమార్, సాషా చెత్రి, కునాల్ రాయ్ కపూర్ తదితరులు
డైరెక్టర్.. రాధాకృష్ణ
నిర్మాతలు.. వంశీ, ప్రమోద్, ప్రసీద
సమర్పణ.. గోపీకృష్ణా మూవీస్
బ్యానర్స్..యూవీ క్రియేషన్స్ , టి సిరీస్ బ్యానర్స్
సంగీతం.. సౌత్.. జస్టిన్‌ ప్రభాకరన్‌, హిందీ.. మిథున్‌, అమాల్‌ మాలిక్‌, మనన్‌ భరద్వాజ్‌, బ్యాక్ గ్రౌండ్ స్కోర్.. థమన్
సినిమాటోగ్రఫి..మనోజ్ పరమహంస

కథ

విక్రమాదిత్య (ప్రభాస్) పాల్మిస్ట్ (హస్త సాముద్రిక నిపుణుడు) గా పనిచేస్తుంటాడు. చేతి రేఖలు చూసి వారి యొక్క భవిష్యత్తును గతంలో జరిగిన విషయాలను సునాయాసంగా చెప్పే వ్యక్తి. ఈ క్రమంలో ఇటలీ వెళ్లిన తను అనుకోకుండా ప్రేరణ (పూజ హెగ్డే)ని కలుసుకుంటాడు. దీంతో ప్రేరణ హస్త రేఖలను చూసి ఆమె భవిష్యత్తు గురించి చెబుతూ ఆమెతో ప్రేమలో పడతాడు. అయితే తనకు ప్రేమ రేఖ లేదని ముందే విక్రమాదిత్యకు తెలుసు. ఈ క్రమంలో ప్రేరణతో ఉన్న భవిష్యత్తు గురించి తెలుసుకున్న విక్రమాదిత్య ఎలాంటి సంఘటనలు ఎదుర్కొన్నాడు. అసలు ఇంతకీ వీరిద్దరి మధ్య ప్రేమ కథ ఏమైందనే ఈ విషయాలు తెలియాలంటే తెరపై సినిమా చూడాల్సిందే…

మూడేళ్ల ప్రయాణం.. ఎన్నో ఇబ్బందులు.. ఎన్నో వాయిదాలు పడిన తరువాత ఎట్టకేలకు ప్రేక్షకుల ముందుకు వచ్చింది ప్రభాస్ రాధేశ్యామ్ సినిమా. నిజంగా ఒక కమర్షియల్ సినిమాను తీయాలంటే ఒక రెండు మూడు నెలల్లో కంప్లీట్ చేసి ఎప్పటిలాగే నాలుగు ఫైట్లు.. ఆరు పాటలు ఉంటే సరిపోతుంది. కానీ అలాంటి సినిమాలు పెద్దగా ఇంపాక్ట్ చూపించవు. కానీ కొన్ని సినిమాలను విజువల్ వండర్ గా ప్రేక్షకులకు చూపించాలన్నా..ఎప్పటికీ గుర్తిండిపోయేలా చేయాలన్నా దానికి టైమ్ పడుతుంది.. బడ్జెట్ కూడా అంతే అవుతుంది. అయితే ఉండాల్సింది కాస్త ఓపిక మాత్రమే.. దానికి ఉదాహరణగా బాహుబలి సినిమా అని చెప్పొచ్చు. ప్రభాస్ ను చూసినవెంటనే అందరికీ మదిలో మెదిలే సినిమా బాహుబలి. ఆ సినిమా తన కెరిర్ కే కాదు తెలుగు సినిమాకే మరోజన్మ నిచ్చింది. బాహుబలి సినిమా తరువాత అందరూ పాన్ ఇండియా సినిమాలు చేయడానికి  ముందుకువస్తున్నారు. ఇక ప్రభాస్ కూడా పాన్ ఇండియా స్టార్ అయిపోయి పాన్ ఇండియా సినిమాలు చేస్తున్నాడు. వాటిలో ఒకటే రాధేశ్యామ్.

రాధేశ్యామ్ అంటేనే అర్ధమవుతుంది.. ఈసినిమా ప్రేమకథ అని. ఈసినిమా టైటిల్ ను ప్రకటించినప్పుడే దేవదాస్-పార్వతీ, రోమియో-జూలియేట్, సలీమ్-అనార్కలీ లాంటి వారి పేర్లు చూసినప్పుడే ఈసినిమాపై ఒక క్లారిటీ వచ్చేసింది చాలామందికి. ఎందుకంటే పైన తెలిపిన వారు గొప్ప ప్రేమికులుగా చరిత్రలో మిగిలిపోయారు కానీ.. వారు మాత్రం కలిసి జీవించలేకపోయారు. అయితే ప్రేమకథలు ఎన్ని వచ్చినా వాటికి మనవాళ్లు ఎప్పుడూ ఫిదా అవుతూనే ఉంటారు. ఇక అలాంటి ప్రేమకథల్లో కొత్త యాంగిల్.. ట్విస్ట్ లు ఉంటే ఇంకెలా ఉంటుంది. రాధాకృష్ణ కూడా అలాంటి కథనే రాసుకున్నాడు. అయితే మన రాత మన చేతుల్లో కాదు.. మన చేతల్లో ఉంటుందని దానికి ప్రేమకథను జోడించి చెప్పాడు. ఇప్పటివరకూ ఇలాంటి పాయింట్ తో ఏ సినిమా రాలేదని చెప్పొచ్చు. హస్తసాముద్రికలో నిపుణుడైన ఓ ప్రేమికుడు ఆఖరికి తన ప్రేమను గెలిపించుకోవడానికే విధికి సైతం ఎదురుతిరగడమే ఈసినిమాకు హైలెట్ పాయింట్. ఫస్ట్ హాఫ్ యూరప్ నేపథ్యం, హీరో హీరోయిన్ల పరిచయం, వారి లవ్ ట్రాక్ నడుస్తుంది. ఇక ప్రేరణ ప్రేమలో పడిన తరువాత కథ అసలు మలుపు తిరుగుతుంది.

ఇక ఈసినిమాకు మొదటి నుండి ప్రధాన బలం ప్రభాస్. ప్రభాస్ వల్లే ఈ సినిమా ఇంత భారీ లెవల్ కు వెళ్లిందని ఇప్పటికే రాధాకృష్ణ పలు సందర్భాల్లో తెలిపారు కూడా. లవర్ బాయ్ పాత్రలో ప్రభాస్ గతంలోనే నటించాడు. ఇప్పుడు కూడా ఆ పాత్రలో పర్ ఫెక్ట్ గా చేశాడు. పామ్ హిస్టరీలో నిపుణుడిగా.. అలానే ప్రేమికుడిగా విక్రమాదిత్య పాత్రలో ప్రభాస్ పరకాయ ప్రవేశం చేసేశాడు. విక్రమాదిత్యకు జంటగా నటించిన పూజాహెగ్డే పాత్ర కూడా మరో హైలెట్. ప్రేరణ పాత్రలో పూజా హెగ్డే కూడా ఒదిగిపోయింది. ప్రభాస్ కు ఏమాత్రం తగ్గకుండా యాక్టింగ్ తో పాటు అందం తో కూడా అదరగొట్టింది. ఇద్దరి మధ్య కెమిస్ట్రీ అద్భుతంగా పండింది. ఇక ప్రభాస్ కు తల్లిపాత్రలో చేసిన భాగ్య శ్రీ కూడా చాలా బాగా చేశారు. మంచి పాత్ర ద్వారా రీఎంట్రీ ఇచ్చే అవకాశం దక్కింది. ఇక మిగిలిన నటీనటులు ఎవరి పాత్రకు వారు న్యాయం చేశారు.

ఇలాంటి సినిమాలకు కథ ఎంత ఇంపార్టెంటో సాంకేతిక విభాగం కూడా అంతే ఇంపార్టెంట్. ఈసినిమాలో ఎక్కువ క్రెడిట్స్ ఎవరికైనా ఇవ్వాలంటే మాత్రం అది ఆర్డ్ డిపార్ట్ మెంట్ కే. ఏదైనా ఒక సెట్ ను డిజైన్ చేయడం అంటేనే చాలా కష్టం.. అలాంటిది ఇటలీ లాంటి ఒక క్లైమేట్ ను ఇక్కడ సెట్స్ ద్వారా రీక్రియేట్ చేయాలంటే అది మాములు విషయం కాదు. ఇండియాలోనే ఇటలీని చూపించేశారు. ఇక మ్యూజిక్.. ఇప్పటికే పాటలు రికార్డులు క్రియేట్ చేస్తున్నాయి.. ముఖ్యంగా చెప్పుకోవాల్సింది బ్యాక్ గ్రౌండ్ స్కోర్.. ఒక్క మాటలో చెప్పాలంటే సినిమాకు ప్రాణం పోసింది. సినిమాటోగ్రఫి లేకపోతే సినిమానే లేదు. అందమైన లోకేషన్స్ ను తన కెమెరాలో బంధించేశాడు మనోజ్ పరమహంస. ఇక ప్రొడక్షన్ వాల్యూస్ గురించి కొత్తగా చెప్పేది ఏం లేదు. 300 కోట్ల బడ్జెట్ అంటేనే అర్ధం చేసుకోవచ్చు.. ఎక్కడా కాంప్రమైజ్ కాలేదని.. ప్రతి ఫ్రేమ్ లో అది కనిపిస్తూనే ఉంది.

ఫైనల్ గా ఇలాంటి కథల గురించి ఒక్క పాయింట్ లో చెప్పడం చాలా కష్టమవుతుంది. ఎందుకంటే కథతో పాటు ప్రేక్షకుడు కూడా ఆ ప్రపంచంలోకి వెళ్లిపోతాడు కాబట్టి.. పీరియాడికల్ లవ్ స్టోరీ.. దానికి తగ్గట్టు సన్నివేశాలు.. పాత్రలు.. విజువల్స్ అన్నీ మిళితమై ప్రతి ఫ్రేమ్ ఆకట్టుకనేలా ఉంటుంది. ఇక ముందు నుండి అంటున్నట్టే విజువల్ వండర్ అని చెప్పడంలో ఎలాంటి సందేహం లేదు. అన్నీ కోణాలు ఈ సినిమాలో ఉండేలా చూపించాడు రాధాకృష్ణ. ఒక కళాఖండం రావాలంటే 24 ఫ్రేమ్స్ పర్ఫెక్ట్ గా ఉంటాలి. అది కొన్ని సినిమాలకు మాత్రమే సాధ్యమవుతుంది. రాధేశ్యామ్ విషయంలో అదే జరిగింది. లవ్ స్టోరీ, క్లాస్ మూవీ, యాక్షన్ సీక్వెన్స్, మిస్టరీ ఎలిమెంట్స్, రొమాంటిక్ ఇలా చాలా కోణాలతో ఈసినిమాను ఒక అందమైన ప్రేమకావ్యంలా తీర్చిదిద్దాడు. ప్రతి ఒక్కరూ తప్పకుండూ చూడాల్సిన సినిమా అని చెప్పడంలో ఎలాంటి సందేహం లేదు.

Radhe Shyam (Telugu) Release Trailer | Prabhas | Pooja Hegde | Radha Krishna | 11th March Release

01:09

Radhe Shyam Trailer REVIEW | Prabhas | Pooja Hegde | Krishnam Raju | Radha Krishna | Radhe Shyam

02:47

Pooja Hegde Fun with Naveen Polishetty | Radhe Shyam Pre Release Event | Prabhas | Krishnam Raju

05:46

Dil Raju Makes Fun With Naveen Polishetty | Radhe Shyam Pre Release Event | Prabhas | Pooja Hegde

03:51