‘బంగార్రాజు’లో కీర్తి సురేష్?

‘కింగ్’ నాగార్జున కెరీర్‌లో హ‌య్య‌స్ట్ గ్రాస‌ర్‌గా నిల‌చిన చిత్రం ‘సోగ్గాడే చిన్ని నాయనా’. 2016 సంక్రాంతికి విడుదలైన ఈ హిలేరియ‌స్ ఎంట‌ర్‌టైన‌ర్‌కి ఇప్పుడు సీక్వెల్ ప్లాన్ జ‌రుగుతున్న సంగ‌తి తెలిసిందే. ‘బంగార్రాజు’ పేరుతో తెర‌కెక్క‌నున్న ఈ కొన‌సాగింపు చిత్రం… తొలి భాగానికి దర్శకత్వం వహించిన కళ్యాణ్ కృష్ణ ద‌ర్శ‌క‌త్వంలోనే రూపొంద‌నుంది.

తొలి భాగంలో తండ్రీకొడుకులుగా ద్విపాత్రాభినయం చేసిన నాగార్జున… ఈ సినిమాలో `బంగార్రాజు`గా టైటిల్ రోల్ పోషిస్తుండగా… అత‌ని మ‌న‌వ‌డి పాత్రలో నాగచైతన్య దర్శనమివ్వనున్నాడని టాక్‌. అంతేకాదు… ఈ సినిమాలో చైతు సరసన ‘మహానటి’ ఫేమ్ కీర్తి సురేష్ నటించనుందని స‌మాచారం. కీర్తి ప్రధాన పాత్ర‌లో రూపొందిన ‘మహానటి’లో చైతూ అతిథి పాత్రలో కనిపించిన విషయం విదితమే. ఇప్పుడు అదే చైతూ సరసన కీర్తి హీరోయిన్‌గా నటిస్తుండడం విశేషం.

అలాగే… నాగార్జున బ్యాక్ టు బ్యాక్ సీక్వెల్స్ ‘మన్మథుడు 2’ (‘మన్మథుడు’కి సీక్వెల్), ‘బంగార్రాజు’ (‘సోగ్గాడే చిన్ని నాయనా’కి సీక్వెల్)లో కీర్తి భాగమవడం కూడా ఆసక్తిని రేకెత్తిస్తోంది.

మరి… అక్కినేని తండ్రీకొడుకుల సరసన నటిస్తున్న ఈ వేర్వేరు చిత్రాలతో… కీర్తి ఏ మేరకు ప్రేక్ష‌కుల‌ను అలరిస్తుందో చూడాలి.