హిట్ కాంబినేషన్స్ తో మూవీ

యంగ్ హీరో నాగశౌర్య, దర్శకుడు అవసరాల శ్రీనివాస్ కాంబినేషన్ లో గతంలో ఊహలు గుస గుస లాడే, జో అచ్యుతానంద చిత్రాలు వచ్చిన సంగతి తెలిసిందే కదా. అవి బాక్సాఫీస్ వద్ద మంచి హిట్ కూడా సాధించాయి. అలాగే నాగశౌర్య, మాళవిక నాయర్ కాంబినేషన్ లో కూడా గతంలో ‘కళ్యాణ వైభోగమే’ సినిమా వచ్చిన సంగతి విదితమే. ఈ సినిమా కూడా మంచి విజయం సాధించింది. అలాంటిది ఇప్పుడు వీరి ముగ్గురి కాంబినేషన్ లో సినిమా అంటే ఎలా ఉంటుంది.

శ్రీనివాస్ అవసరాల దర్శకత్వంలో నాగశౌర్య, మాళవిక హీరో హీరోయిన్లుగా కొత్త సినిమా తెరకెక్కబోతుంది. పీపుల్ మీడియా ఫ్యాక్టరీ,దాసరి ప్రొడక్షన్స్ సంయుక్తంగా ఈ సినిమాను నిర్మిస్తున్నారు. ఈ విషయాన్ని నిర్మాతలు టి.జి.విశ్వప్రసాద్, దాసరి పద్మజ, సహ నిర్మాత వివేక్ కూచి భొట్ల అధికారికంగా ప్రకటించారు. ఈసందర్భంగా వారు మాట్లాడుతూ… ఇలాంటి విజయ వంతమైన చిత్రాల నాయక,నాయికలు, దర్శకుడు, ప్రతిభ కలిగినవారితో ఈ చిత్రాన్ని నిర్మించటం ఎంతో ఆనందంగా ఉంది… మార్చి రెండవ వారంలో చిత్రం షూటింగ్ ప్రారంభమవుతుంది… చిత్రంలోని ఇతర నటీనటులు, సాంకేతిక నిపుణుల వివరాలు కొద్ది రోజులలోనే ప్రకటిస్తామని తెలిపారు.