అల్లు అర్జున్‌తో ముచ్చ‌ట‌గా మూడోసారి…?

స్టైలిష్ స్టార్ అల్లు అర్జున్‌కి క‌లిసొచ్చిన సంగీత ద‌ర్శ‌కుల‌లో యంగ్ మ్యూజిక్ సెన్సేష‌న్ త‌మ‌న్ ఎస్‌ ఒక‌రు. బ‌న్నీ, త‌మ‌న్ కాంబినేష‌న్‌లో వ‌చ్చిన `రేసుగుర్రం`, `స‌రైనోడు` మ్యూజిక‌ల్‌గా మెప్పించ‌డ‌మే కాదు… బాక్సాఫీస్ వ‌ద్ద మ్యాజిక్ చేశాయి. అలాంటి… ఈ ఇద్ద‌రి కాంబినేష‌న్‌లో ముచ్చ‌ట‌గా మూడోసారి మ‌రో సినిమా రాబోతోంద‌ని టాలీవుడ్ టాక్‌.

ఆ వివ‌రాల్లోకి వెళితే… `జులాయి`, `స‌న్నాఫ్ స‌త్య‌మూర్తి` వంటి విజ‌య‌వంత‌మైన చిత్రాల త‌రువాత మాట‌ల మాంత్రికుడు త్రివిక్ర‌మ్, బ‌న్నీ క‌ల‌యిక‌లో మ‌రో చిత్రం రాబోతున్న సంగ‌తి తెలిసిందే. ఈ సినిమాకి స్వ‌ర‌క‌ర్త‌గా త‌మ‌న్ ఎంపిక‌య్యాడ‌ని ఫిల్మ్‌న‌గ‌ర్ వ‌ర్గాల స‌మాచారం. త్రివిక్ర‌మ్ గ‌త చిత్రం `అర‌వింద స‌మేత‌`కి త‌మ‌న్ అందించిన బాణీలు, నేప‌థ్య సంగీతం… స‌ద‌రు యాక్ష‌న్ ఎంట‌ర్‌టైన‌ర్‌కి అద‌నపు బ‌లంగా నిలిచాయి. ఈ నేప‌థ్యంలో… బ‌న్నీతో చేయ‌బోయే సినిమాకి కూడా త‌మ‌న్‌నే మ్యూజిక్ కంపోజ‌ర్‌గా ఎంచుకున్నాడ‌ట త్రివిక్ర‌మ్‌. త్వ‌ర‌లోనే త‌మ‌న్ ఎంట్రీపై అధికారిక ప్ర‌క‌ట‌న రావ‌చ్చు.

గీతా ఆర్ట్స్‌, హారికా అండ్ హాసిని క్రియేష‌న్స్ సంస్థ‌లు సంయుక్తంగా నిర్మిస్తున్న ఈ సినిమా ఏప్రిల్ నుంచి రెగ్యుల‌ర్ షూటింగ్ జ‌రుపుకోనుందని స‌మాచారం. మ‌రి… అటు త్రివిక్ర‌మ్‌తోనూ, ఇటు త‌మ‌న్‌తోనూ బ‌న్నీ హ్యాట్రిక్ కొడ‌తాడేమో చూడాలి.