రాజమౌళికి అరుదైన గౌరవం – గోదావరి బోస్టన్ ఘనస్వాగతం

బాహుబలి సినిమాతో జాతీయ స్థాయిలోనే కాకుండా అంతర్జాతీయ స్థాయిలో అటు తెలుగు పరిశ్రమతో పాటు.. తనకు కూడా మంచి గుర్తింపు తెచ్చుకున్నాడు స్టార్ డైరెక్టర్ రాజమౌళి. బాహుబలి ద బిగినింగ్.. బాహుబలి ద కంక్లూజన్ అంటూ రెండు పార్ట్ లుగా తీసిన ఈ సినిమా కలెక్షన్ల పరంగా ఎన్నో రికార్డులు బద్దలుకొట్టింది. ఇక సినిమాకు గాను ఎన్నో అవార్డులు కూడా వచ్చాయి.

ఇప్పుడు తాజాగా రాజమౌళికి మరో అరుదైన గౌరవం దక్కింది. ప్ర‌పంచంలోనే అత్యంత వేగంగా ఎదుగుతున్న ఇండియన్ రెస్టారెంట్ చైన్ ‘గోదావ‌రి’ రాజ‌మౌళికి.. హార్వ‌ర్డ్ యూనివ‌ర్సిటీలో ఇండియా కాన్ఫ‌రెన్స్-2019కు హాజ‌రు కావాల్సిందిగా స్వాగతం పలికింది. మరి గతంలో ఈ ప్ర‌తిష్టాత్మ‌క స‌దస్సుకు భార‌త‌దేశానికి చెందిన ప్ర‌ముఖులు క‌మ‌ల్ హాసన్, షారుక్ ఖాన్‌, ప‌వ‌న్ క‌ళ్యాణ్ స‌హా మ‌రెంద‌రో ప్ర‌ముఖులను స్వాగతించగా.. ఇప్పుడు రాజమౌళిని ఆహ్వానించడం గొప్ప విషయమే.

ఇక ఈ సందర్భంగా గోదావరి టీమ్.. భారతీయ సినీ పరిశ్రమకు ప్రపంచ వ్యాప్తంగా గుర్తింపుతెచ్చిన మన తెలుగువాళ్ల సత్తా చాటిన ప‌ద్మ‌శ్రీ అవార్డు గ్ర‌హిత రాజ‌మౌళిని ఈ సద్దస్సుకు ఆహ్వానించడం చాలా సంతోషాన్నిక‌లిగిస్తోందన్నారు. అంతేకాదు..బాహుబలి సినిమా ఫస్ట్ పార్ట్ రిలీజైనప్పుడు బోస్టన్ లో మొదటి గోదావరి రెస్టరెంట్ ప్రారంభించాం… ఆ సినిమా ఎంత సక్సెస్ అయిందో.. గోదావ‌రి సైతం అంతే సక్సెస్ అయిందని.. తమకంటూ ఓ ప్రత్యేక స్థానాన్ని ఏర్పరుచుకుందని తెలిపారు.

బాహుబలి సినిమా విజయం వెనుక ఆయన శ్రమ ఎంత ఉందో మాకు తెలుసు.. ఆయన హార్డ్ వర్క్ ఇప్పటి యంగ్ జనరేషన్ కు స్ఫూర్తిగా నిలవాలి.. ఈ మొత్తం ప్ర‌క్రియ‌ను మేం కేస్ స్ట‌డీగా భావిస్తున్నాం. అందుకే విద్యార్థులు మ‌రియు మాలాంటి యంగ్ఎంట‌ర్‌ప్రెన్యూర్ల‌ను ఉద్దేశించి ప్ర‌సంగించాల‌ని హార్వ‌ర్డ్ కోర‌డాన్ని మేం గౌర‌వంగా భావిస్తున్నాం” అని ‘టీం’ గోదావ‌రి స్ప‌ష్టం చేసింది. మొత్తానికి రాజమౌళికి ఈ గౌరవం దక్కడం హర్షించతగ్గ విషయమే.

[subscribe]
[youtube_video videoid=-fIckspYhns]