రివ్యూ : నాగబంధం

నటీనటులు: విరాట్ కర్ణ, నభా నటేష్, జగపతిబాబు, మురళీ శర్మ, రిషబ్ సాహ్ని తదితరులు.

దర్శకత్వం & రచన: అభిషేక్ నామా

నిర్మాతలు: కిషోర్ అన్నపురెడ్డి, నిషిత నాగిరెడ్డి

సంగీతం: జునైద్ కుమార్, అభి

సినిమాటోగ్రఫీ: సుందర్ రాజన్ ఎస్.

ఎడిటింగ్: ఆర్.సి. ప్రణవ్

విరాట్ కర్ణ కథానాయకుడిగా, అభిషేక్ నామా దర్శకత్వంలో రూపొందిన విజువల్ వండర్ ‘నాగబంధం’.సనాతన ధర్మం, పురాణాల గొప్పదనాన్ని నేటి తరం విజువల్ హంగులతో జోడించి తెరకెక్కింది ఈసినిమా. ట్రైలర్ తో ఈసినిమాకు భారీ హైప్ వచ్చింది. ప్రమోషన్స్ కూడా గట్టిగానే చేశారు. ఇక ఈసినిమా భారీ అంచనాల మధ్య ఈరోజే థియేటర్లలోకి వచ్చింది. మరి నాగబంధం ఎలా ఉంది ? అంచనాలను అందుకుందో లేదో రివ్యూలో తెలుసుకుందాం.

కథ:

ఈ కథ 1960ల నేపథ్యంలో ప్రారంభమవుతుంది. ప్రముఖ పురావస్తు శాస్త్రవేత్త ప్రభాకర్ (జగపతిబాబు) బృందానికి చెందిన ఇద్దరు స్కాలర్లు అబ్దాలీ (రిషబ్ సాహ్ని), టెస్లా కలిసి హిమాలయాల్లో ‘నాగబంధం’ విముక్తికి సంబంధించిన ఒక రహస్య పురాతన పుస్తకాన్ని కనుగొంటారు. అయితే, అబ్దాలీ స్వార్థంతో ఆ పుస్తకాన్ని సొంతం చేసుకుని, కాలవృక్షం బంధనంలో ఉన్న భైరాగి (గరుడ రామ్)తో చేతులు కలిపి బ్రహ్మాండాన్ని శాసించాలనుకుంటాడు.

ఈ నాగబంధం విముక్తికి శ్రీ రంగనాథ స్వామి నాభిపై ఉండే ‘బ్రహ్మకమలం’ అత్యంత కీలకమని అబ్దాలీ తెలుసుకుంటాడు. దాన్ని దక్కించుకునే క్రమంలో ఒక గూడెంలో నివసించే రుద్ర (విరాట్ కర్ణ) కుటుంబాన్ని అంతం చేస్తాడు. అధర్మం మితిమీరినప్పుడు ధర్మరక్షణ కోసం రుద్ర ఎలా ఎదురుతిరిగాడు? 17వ శతాబ్దానికి చెందిన నాగసాధువు శివకు, ఈ రుద్రకు ఉన్న లంకె ఏమిటి? రుద్ర జీవితంలోకి పార్వతి (నభా నటేష్) ఎలా వచ్చింది? చివరికి బ్రహ్మకమలాన్ని కాపాడి ధర్మాన్ని ఎలా నిలబెట్టారు అనేదే ఈ చిత్ర ప్రధాన ఇతివృత్తం.

విశ్లేషణ :సినిమా ప్రారంభ సన్నివేశాలతోనే దర్శకుడు ప్రేక్షకుడిని ఒక సరికొత్త ఫాంటసీ ప్రపంచంలోకి తీసుకెళ్తాడు. హిమాలయాల్లో రహస్య పుస్తకం కోసం జరిగే అన్వేషణ, ఆ తర్వాత వచ్చే ఘర్షణ సీన్లు సినిమాపై ఆసక్తిని పెంచుతాయి. హీరో రుద్ర గూడెం నేపథ్యం, అతని కుటుంబ డ్రామాను చాలా చక్కగా చూపించారు. భైరవకోన పరిసరాల్లో జరిగే అడ్వెంచర్ సీన్స్, హీరో చేసే సాహసాలు ప్రేక్షకులను థ్రిల్ చేస్తాయి. ముఖ్యంగా ఇంటర్వెల్ ముందు వచ్చే భారీ యాక్షన్ ఎపిసోడ్ సినిమాకే హైలైట్‌గా నిలుస్తుంది. హై-వోల్టేజ్ ఫైట్ సీన్‌తో ఫస్ట్ హాఫ్ చాలా పవర్‌ఫుల్‌గా ముగుస్తుంది.

సెకండ్ హాఫ్ ప్రారంభంలో హీరోయిన్ చెప్పే ఫ్లాష్‌బ్యాక్ స్టోరీ కథను మరింత ముందుకు నడిపిస్తుంది. ఆ తర్వాత సినిమా అనూహ్యంగా 17వ శతాబ్దపు కాలంలోకి వెళ్తుంది. ఈ పీరియడ్ ఎపిసోడ్‌లో వచ్చే విజువల్స్, నాగసాధువుల నేపథ్యం, గ్రాఫిక్స్ వర్క్ అద్భుతంగా కుదిరాయి. బ్రహ్మకమలం చుట్టూ జరిగే పోరాటం, సనాతన ధర్మం యొక్క విశిష్టతను చాటిచెప్పే సంభాషణలు ప్రేక్షకులను కట్టిపడేస్తాయి. క్లైమాక్స్ యాక్షన్ సీక్వెన్స్ విజువల్స్ పరంగా మైండ్ బ్లోయింగ్ అనిపిస్తుంది. పార్ట్-2 కోసం ఇచ్చిన లీడ్‌తో సినిమా చాలా ఆసక్తికరంగా ముగుస్తుంది.

నటీనటుల ప్రతిభ :

రుద్ర మరియు 17వ శతాబ్దపు శివ అనే రెండు విభిన్న కాలాల పాత్రల్లో విరాట్ అద్భుతంగా రాణించాడు. రెండు పాత్రల గెటప్స్ అతనికి పర్ఫెక్ట్‌గా సెట్ అయ్యాయి. ముఖ్యంగా సెకండ్ హాఫ్‌లో వచ్చే ఎమోషనల్ అండ్ యాక్షన్ సీన్స్‌లో చాలా పవర్‌ఫుల్ పర్‌ఫార్మెన్స్ ఇచ్చాడు.

నభా నటేష్, ఐశ్వర్య మేనన్, దక్ష నగర్కర్: గ్లామర్‌తో పాటు కథకు అవసరమైన పాత్రల్లో ఈ ముగ్గురు కథానాయికలు చక్కగా ఒదిగిపోయారు. ముఖ్యంగా నభా నటేష్ పాత్ర కథను మలుపు తిప్పడంలో కీలకంగా ఉంటుంది.

జగపతిబాబు, మురళీ శర్మ, మహేష్ మంజ్రేకర్: తమ అనుభవంతో సినిమాకు ఒక గంభీరతను తీసుకువచ్చారు.

విలన్స్ (రిషబ్ సాహ్ని, గరుడ రామ్): క్రూరమైన విలనిజంతో సినిమాకు కావలసినంత బలాన్ని ఇచ్చారు. వీరి నటన హీరో పాత్రను మరింత ఎలివేట్ చేయడానికి తోడ్పడింది.

సాంకేతిక వర్గం:

ఈ సినిమాకు అసలైన హీరోలు సాంకేతిక నిపుణులని చెప్పాలి.ముఖ్యంగా ఆర్ట్ డైరెక్టర్ అశోక్ కుమార్ పనితనం సినిమాకు ప్రాణప్రదంగా నిలిచింది. ఆయన సృష్టించిన అద్భుతమైన సెట్లు, 17వ శతాబ్దపు కాలేజీలు, గూడెం వాతావరణం, పురాతన రహస్య ప్రదేశాల డిజైన్ సినిమాను విజువల్‌గా చాలా రిచ్‌గా మార్చాయి. వీఎఫ్‌ఎక్స్‌తో సింక్ అవుతూ ఆయన చేసిన లార్జర్-దెన్-లైఫ్ ఆర్ట్ వర్క్ సినిమాకు మెయిన్ పిల్లర్. సుందర్ రాజన్ ఎస్. సినిమాటోగ్రఫీ ప్రతి ఫ్రేమ్‌ను ఒక పెయింటింగ్‌లా మార్చేసింది. జునైద్ కుమార్, అభిల నేపథ్య సంగీతం యాక్షన్ సీన్స్‌ను వేరే లెవెల్‌కు తీసుకెళ్లింది. దర్శకుడు అభిషేక్ నామా ఒక భారీ మైథాలజీ ఫాంటసీని తెరపై విజువల్ వండర్‌గా ఆవిష్కరించడంలో సఫలీకృతుడయ్యాడు.ఎడిటర్ ఆర్.సి. ప్రణవ్ వర్క్ ఇక్కడ ప్రత్యేకంగా చెప్పుకోవాలి. సినిమా నిడివి చాలా ఎక్కువే ఉన్నప్పటికీ, ఎక్కడా ప్రేక్షకుడికి బోర్ కొట్టకుండా గ్రిప్పింగ్‌గా స్క్రీన్‌ప్లేను నడిపించడంలో ఆయన సఫలీకృతుడయ్యారు. సీన్ల మధ్య ట్రాన్సిషన్స్, ముఖ్యంగా కాలాల మధ్య మారే పీరియడ్ ఎపిసోడ్‌లను చాలా స్మార్ట్‌గా ఎడిట్ చేసి కథలో వేగాన్ని తగ్గకుండా చూశారు.

చివరగా ‘నాగబంధం’ అనేది కేవలం ఒక సినిమా మాత్రమే కాదు, వెండితెరపై ఆస్వాదించాల్సిన ఒక విజువల్ ఫీస్ట్. అద్భుతమైన గ్రాఫిక్స్, అబ్బురపరిచే కెమెరా పనితనం, సనాతన ధర్మం నేపథ్యంలోని కథాంశం మరియు భారీ యాక్షన్ సన్నివేశాలు ఈ చిత్రాన్ని ఒక గొప్ప అడ్వెంచర్ థ్రిల్లర్‌గా నిలబెట్టాయి. విజువల్స్ మరియు మైథాలజీ సినిమాలను అమితంగా ఇష్టపడే ప్రేక్షకులు థియేటర్లలో అస్సలు మిస్ అవ్వకూడని లార్జర్-దెన్-లైఫ్ మూవీ ఇది.

ఆన్‌లైన్ లో మూవీస్ ని వీక్షించేందుకు కింద ఉన్న లింక్స్ ని క్లిక్ చేసి వినోదాన్ని పొందగలరు : 👇

తెలుగు          తమిళ్          కన్నడ          మలయాళం          డబ్ద్ ఫిలిమ్స్

x