వెంకటేష్ ‘ధ్రువనక్షత్రం’కు 30 ఏళ్ళు

‘విక్టరీ’ వెంకటేష్ కథానాయకుడిగా పలు విజయవంతమైన చిత్రాలు వ‌చ్చాయి. వాటిలో ‘ధ్రువనక్షత్రం’ ఒకటి. వై.నాగేశ్వరరావు దర్శకత్వం వహించిన ఈ సినిమాని శ్రీ ఉషా ఆర్ట్ ప్రొడక్షన్స్ పతాకంపై కె.అశోక్ కుమార్ నిర్మించారు. వెంకటేష్ సరసన రజిని కథానాయికగా నటించిన ఈ చిత్రంలో ‘ఊర్వశి’ శారద, భానుచందర్, రోహిణి, కైకాల సత్యనారాయణ, బ్రహ్మానందం, రాళ్ళపల్లి, శివకృష్ణ, గొల్లపూడి మారుతీరావు, నూతన్ ప్రసాద్ త‌దిత‌రులు ఇతర ముఖ్య‌ పాత్రలు పోషించారు.

ప‌రుచూరి బ్ర‌ద‌ర్స్ క‌థ‌ను అందించిన ఈ సినిమాకి… స్వరకర్త చక్రవర్తి బాణీలు అందించ‌గా ఆచార్య ఆత్రేయ, వేటూరి సుందరరామూర్తి గీత రచన చేశారు. “ఈ అర్ధరాత్రిలోన పాపా”, “కసిగా ఓ కౌగిలి ఇస్తా”, “రంభలకి రంగులకి”, “హౌలే హౌ లవ్లీ లవ్” గీతాల‌తో పాటు… “పెళ్లి పెళ్లి ” అనే పాట (హాసన్ జహంగీర్ పాడిన “హవా హవా”కి తెలుగు వెర్ష‌న్‌) ఆ రోజుల్లో విశేషాద‌ర‌ణ పొందాయి. 1989 జూన్ 29న విడుదలై మంచి విజయాన్ని నమోదు చేసిన ‘ధ్రువనక్షత్రం’… నేటితో 30 వసంతాలను పూర్తి చేసుకుంటోంది.

ఈ చిత్రాన్ని హిందీలో ‘జీవన్ ఏక సంఘర్ష్’ పేరుతో సురేష్ ప్రొడక్షన్స్ పతాకంపై డి.రామానాయుడు పునర్నిర్మించగా… ఆ సినిమా కూడా విజయం సాధించడం విశేషం.