`96` తెలుగు రీమేక్‌ ప‌ట్టాలెక్కేది ఆ రోజేనా?

గ‌త ఏడాది ద్వితీయార్ధంలో త‌మిళ‌నాట సంచ‌ల‌నం సృష్టించిన చిత్రం `96`. విజ‌య్ సేతుప‌తి, త్రిష ప్ర‌ధాన పాత్ర‌ల్లో న‌టించిన ఈ ఫీల్‌గుడ్ రొమాంటిక్ ఎంట‌ర్‌టైన‌ర్… ఇప్పుడు తెలుగులో రీమేక్ కానున్న సంగ‌తి తెలిసిందే. విజ‌య్ సేతుప‌తి పాత్ర‌లో శ‌ర్వానంద్‌, త్రిష పాత్ర‌లో స‌మంత న‌టించ‌నున్న ఈ సినిమాకి త‌మిళ వెర్ష‌న్ డైరెక్ట‌ర్ సి.ప్రేమ్ కుమార్ ద‌ర్శ‌క‌త్వం వ‌హించ‌నున్నాడు. స‌క్సెస్‌ఫుల్ ప్రొడ్యూస‌ర్ `దిల్‌` రాజు ప్ర‌తిష్ఠాత్మ‌కంగా నిర్మించ‌నున్న ఈ సినిమాకి సంబంధించిన షూటింగ్ కార్య‌క్ర‌మాలు ఉగాది ప‌ర్వ‌దినం సంద‌ర్భంగా ఏప్రిల్ 6న లాంఛ‌నంగా ప్రారంభించ‌నున్న‌ట్లు క‌థ‌నాలు వినిపిస్తున్నాయి.

అంతేకాదు… నూత‌న సంవ‌త్స‌రాదికి ఈ చిత్రాన్ని ప్రారంభించి… వెనువెంట‌నే రెగ్యుల‌ర్ షూటింగ్‌ని స్టార్ట్ చేసి… ఈ ఏడాది ద్వితీయార్ధంలో సినిమాని ప్రేక్ష‌కుల ముందుకు తీసుకువ‌చ్చే దిశ‌గా ప్ర‌య‌త్నాలు జ‌రుగుతున్నాయ‌ని స‌మాచారం. త్వ‌ర‌లోనే ఈ క్రేజీ ప్రాజెక్ట్‌కి సంబంధించిన పూర్తి వివ‌రాలు అధికారికంగా వెల్ల‌డి కానున్నాయి.