నాగార్జున `విక్కీదాదా`కి 30 ఏళ్ళు

కింగ్ నాగార్జున – కామాక్షి మూవీస్ అధినేత డి.శివ‌ప్ర‌సాద్ రెడ్డి కాంబినేష‌న్‌లో ప‌లు విజ‌య‌వంత‌మైన చిత్రాలు వ‌చ్చాయి. వాటిలో `విక్కీ దాదా` ఒక‌టి. నాగార్జున‌కి క‌లిసొచ్చిన ద‌ర్శ‌కుల‌లో ఒక‌రైన ఎ.కోదండ‌రామిరెడ్డి ఈ చిత్రాన్ని తెర‌కెక్కించాడు. నాగ్‌కి జోడీగా జూహీ చావ్లా, రాధ న‌టించిన ఈ చిత్రంలో క‌న్న‌డ ప్ర‌భాక‌ర్‌, గొల్ల‌పూడి మారుతి రావు, గిరి బాబు, రంగ‌నాథ్‌, కోట శ్రీ‌నివాస‌రావు, శ్రీ‌విద్య‌, వ‌ర‌ల‌క్ష్మి, క‌ల్ప‌నా రాయ్ త‌దిత‌రులు ఇత‌ర ముఖ్య పాత్ర‌లు పోషించారు. యండ‌మూరి వీరేంధ్ర‌నాథ్ క‌థ‌ను అందించిన ఈ చిత్రానికి ప‌రుచూరి బ్ర‌ద‌ర్స్ స్క్రీన్ ప్లే ని, గ‌ణేష్ పాత్రో సంభాష‌ణ‌ల‌ను అందించారు. రాజ్ – కోటి బాణీల‌కు వేటూరి సుంద‌ర‌రామ్మూర్తి సాహిత్య‌మందించారు. ఈ సినిమాలోని పాట‌ల‌న్నీ ప్ర‌జాద‌ర‌ణ పొందాయి. ముఖ్యంగా… `ఓ బేబి నీ మీద బెంగ ప‌డ్డా` పాట అయితే అప్ప‌ట్లో సంచ‌ల‌నం సృష్టించింది. 1989 మార్చి 11న విడుద‌లైన `విక్కీ దాదా` నేటితో 30 వ‌సంతాల‌ను పూర్తిచేసుకుంటోంది.