`118` ప్రీ-రిలీజ్ ఈవెంట్‌కు అతిథులుగా బాల‌కృష్ణ‌, య‌న్టీఆర్‌!

నందమూరి క‌ళ్యాణ్ రామ్ క‌థానాయ‌కుడిగా న‌టించిన తాజా చిత్రం `118`. నివేదా థామ‌స్‌, షాలినీ పాండే క‌థానాయిక‌లుగా న‌టించిన ఈ సినిమాకి కె.వి.గుహ‌న్ ద‌ర్శ‌క‌త్వం వ‌హించగా… మ‌హేష్ కోనేరు నిర్మాత‌గా వ్య‌వ‌హ‌రించారు. తాజాగా సెన్సార్ కార్య‌క్ర‌మాలు పూర్తి చేసుకున్న ఈ సినిమాకి… సెన్సార్ క‌మిటీ `యు/ఎ` స‌ర్టిఫికేట్ జారీ చేసింది. మార్చి 1న ఈ సినిమా ప్రేక్ష‌కుల ముందుకు రానుంది.

ఇదిలా ఉంటే… ఈ సినిమాకు సంబంధించిన ముంద‌స్తు విడుద‌ల వేడుక (ప్రీ-రిలీజ్ ఈవెంట్‌) ఈ రోజు సాయంత్రం హైద‌రాబాద్‌లోని ఫిల్మ్‌న‌గ‌ర్ జె.ఆర్.సి క‌న్వెన్ష‌న్‌లో జ‌రుగనుంది. ఈ వేడుక‌కు ముఖ్య అతిథులుగా న‌ట‌సింహ నంద‌మూరి బాల‌కృష్ణ‌, యంగ్ టైగ‌ర్ య‌న్టీఆర్ హాజ‌రు కానున్నార‌ని చిత్ర యూనిట్ అధికారికంగా ప్ర‌క‌టించింది. ఒకే వేదిక‌పై మ‌రోసారి నంద‌మూరి బాబాయ్‌-అబ్బాయిలు క‌నిపించనుండ‌డం… అభిమానుల‌కు క‌నువిందు అనే చెప్పాలి. మ‌రి… ఇప్ప‌టికే టీజ‌ర్‌, ట్రైల‌ర్‌తో ఆక‌ట్టుకున్న యాక్ష‌న్ థ్రిల్ల‌ర్ `118`కి… బాల‌య్య‌, తార‌క్ ప్ర‌జెన్స్ మ‌రింత బ‌జ్ పెంచుతుందేమో చూడాలి.