`బొమ్మ‌రిల్లు` ద‌ర్శ‌కుడితో అఖిల్‌?

ఊహ తెలియ‌ని వ‌య‌సులోనే `సిసింద్రీ`గా న‌టించి అల‌రించాడు అక్కినేని అఖిల్‌. ఆ త‌రువాత‌… అక్కినేని కుటుంబ క‌థానాయ‌కులంతా క‌ల‌సి న‌టించిన `మ‌నం`లో అతిథి పాత్ర‌లో అద‌ర‌గొట్టాడు. స్వ‌ల్ప విరామం తీసుకుని `అఖిల్‌`తో హీరోగా ఎంట్రీ ఇచ్చిన ఈ అక్కినేని వారి మూడో త‌రం క‌థానాయ‌కుడు… త‌ద‌నంత‌రం `హ‌లో`, `మిస్ట‌ర్ మ‌జ్ను` చిత్రాల‌తో సంద‌డి చేశాడు. అయితే… క‌థానాయ‌కుడిగా న‌టించిన ఈ మూడు సినిమాల్లోనూ అఖిల్ న‌ట‌న‌కి మంచి మార్కులు ద‌క్కినా… ఆశించిన విజ‌యాలైతే ద‌క్క‌లేదు. ఈ నేప‌థ్యంలో… త‌దుప‌రి చిత్రం విష‌యంలో ఆచితూచి అడుగులు వేస్తున్నాడు అఖిల్‌.

ఇదిలా ఉంటే… అఖిల్ నాలుగో చిత్రానికి సంబంధించి తాజాగా ఓ ఆస‌క్తిక‌ర‌మైన విష‌యం తెలిసింది. అదేమిటంటే… ప్ర‌ముఖ నిర్మాత అల్లు అర‌వింద్ స‌మ‌ర్ప‌ణ‌లో బ‌న్నీ వాస్ నిర్మాత‌గా అఖిల్ నెక్ట్స్ ప్రాజెక్ట్ ఉంటుంద‌ని టాలీవుడ్ టాక్‌. అలాగే… `బొమ్మ‌రిల్లు` ఫేమ్ భాస్క‌ర్ ద‌ర్శ‌క‌త్వంలో ఈ చిత్రం తెర‌కెక్కుతుంద‌ని… గోపీసుంద‌ర్ సంగీత ద‌ర్శ‌కుడిగా ఎంపిక‌య్యాడ‌ని స‌మాచారం. త్వ‌ర‌లోనే ఈ క్రేజీ ప్రాజెక్ట్‌కి సంబంధించిన పూర్తి వివ‌రాలు వెల్ల‌డి కానున్నాయి.