మహర్షి డబ్బింగ్ ప్రారంభం

వంశీ పైడిపల్లి దర్శకత్వంలో మహేష్ హీరోగా మహర్షి సినిమా తెరకెక్కుతున్న సంగతి తెలిసిందే. భారీ బడ్జెట్ తో తెరకెక్కుతున్న ఈసినిమా ప్రస్తుతం షూటింగ్ జరుపుకుంటోంది. గత కొద్దికాలంగా షెడ్యూల్ వారీగా షూటింగ్ జరుపుకుంటుండగా.. ఇప్పుడు షూటింగ్ కూడా చివరి దశకు చేరుకుంది. పొల్చాచ్చి, తమిళనాడులో ఇటీవలే షూటింగ్ ముగించుకోగా.. నెక్ట్స్ షెడ్యూల్ హైదరాబాద్ లో ప్రారంభం కానున్నట్టు తెలుస్తోంది. దాని తరువాత నెక్ట్స్ షెడ్యూల్ ను అబుదాబిలో చేయనున్నారని ఇప్పటికే వార్తలు వచ్చిన సంగతి తెలిసిందే. అక్కడ కొన్ని కీలక సన్నివేశాలను చిత్రీకరించనున్నారట. అబుదాబి షెడ్యూల్ తో.. ఈ సినిమా షూటింగ్‌ కూడా పూర్తవుతుందని సమాచారం.

ఇక షూటింగ్ కూడా చివరి దశకు చేరుకుంటున్న నేపథ్యంలో పోస్ట్‌ ప్రొడక్షన్‌ కార్యక్రమాల స్పీడు పెంచారు చిత్ర యూనిట్. తాజాగా ఈ సినిమా డబ్బింగ్‌ పనులు ప్రారంభించాడు దర్శకుడు వంశీ. ఈ కార్యక్రమంలో హీరో అల్లరి నరేష్‌తో పాటు నిర్మాత దిల్‌ రాజు పాల్గొన్నారు.

కాగా ఈ సినిమాలో మహేష్ సరసన కథానాయికగా పూజా హెగ్డే నటిస్తుండగా, మహేష్ స్నేహితుడిగా కీలకమైన పాత్రలో అల్లరి నరేష్ కనిపించనున్నాడు. ‘దిల్‌’ రాజు, అశ్వనీదత్, పీవీపీ సంయుక్తంగా ఈసినిమాను నిర్మిస్తున్నారు. దేవీ శ్రీ ప్రసాద్‌ సంగీతమందిస్తున్నారు. ఈ సినిమాను ఏప్రిల్‌లో రిలీజ్ చేసేందుకు ప్లాన్‌ చేస్తున్నారు.