స్టార్‌డమ్, సింప్లిసిటీ కలగలిసిన సూపర్‌స్టార్‌ మహేష్ బాబు

టాలీవుడ్ స్టార్ హీరోలలో ప్రిన్స్, సూపర్‌స్టార్‌ మహేష్ బాబు స్టయిలే వేరు. అందంగా నవ్వుతూ, అంతకు మించిన వినయంగా కనిపించడం ఈ స్టార్ హీరో మేటి లక్షణం. తెలుగులోనే కాదు, దేశవ్యాప్తంగా అభిమానులను సంపాదించుకున్న మహేష్ బాబు సినీ ప్రస్థానాన్ని గురించి చెప్పుకుంటే, ఎంతోమంది యువతకు స్ఫూర్తిదాయకం. నటుడిగా ఆయన ప్రస్థానం చిన్నప్పటి నుంచే మొదలై, నేడు కోట్లాదిమంది హృదయాల్లో నిలిచిపోయేలా సాగుతోంది. మహేష్ బాబు నేడు (ఆగస్టు 9) జన్మదినం జరుపుకుంటున్నారు. ఈ నేపథ్యంలో ఆయనపై స్పెషల్ స్టోరీ..

బాలనటుడిగా తెరంగేట్రం..

కాగా మహేష్ బాబు అసలు పేరు ఘట్టమనేని మహేష్ బాబు. 1975 ఆగస్టు 9న చెన్నైలో జన్మించారు. ఆయన తండ్రి ఘట్టమనేని కృష్ణ గారు తెలుగు సినీ చరిత్రలో లెజెండరీ యాక్టర్. చిన్నప్పటి నుండే సినిమాలపై మక్కువ చూపిన మహేష్, నాలుగేళ్ల వయసులోనే తన తొలి సినిమా ‘నీడ’ (1979) ద్వారా వెండితెరకు పరిచయమయ్యారు. ఆ తరువాత ప్రముఖ దర్శకుడు కోడి రామకృష్ణ కోరిక మేరకు ‘పోరాటం’ సినిమాలో తండ్రి కృష్ణకు తమ్ముడిగా నటించాడు.

1987లో తొలిసారిగా తన తండ్రి దర్శకత్వం వహించిన శంఖారావం చిత్రంలో నటించాడు. ఆపై 1988లో ‘బజార్ రౌడీ’లో అన్నయ్య రమేష్ తో కలిసి నటించాడు. అలాగే అదే ఏడాది మరల తన తండ్రి, అన్నయ్యలతో కలిసి ‘ముగ్గురు కొడుకులు’ సినిమాలో నటించాడు. దీనితర్వాత 1989లో గూడచారి 117, కొడుకు దిద్దిన కాపురం (తొలిసారి ద్విపాత్రభినయం) చిత్రాలలో నటించాడు. ఇంకా 1990లో ‘బాలచంద్రుడు, అన్న – తమ్ముడు’ సినిమాలతో బాలనటుడిగా తన తొలి ఇన్నింగ్స్‌ని ముగించాడు.

హీరోగా ఎంట్రీ & కెరీర్ టర్నింగ్..

మహేష్ బాబు హీరోగా ఎంట్రీ ఇచ్చిన తొలి సినిమా రాజ కుమారుడు (1999). ఈ సినిమాతోనే ఆయనకు ‘ప్రిన్స్’ అనే బిరుదు వచ్చింది. అభిమానులతోపాటు ప్రేక్షకులందరి మనసులను గెలుచుకున్న ఈ చిత్రం మహేష్ కెరీర్‌కు మంచి బూస్ట్ ఇచ్చింది. అనంతరం వచ్చిన ‘మురారి, ఒక్కడు, అర్జున్, అతడు’ సినిమాలు మహేష్ టాలెంట్‌కు నిలువెత్తు నిదర్శనంగా నిలిచాయి. ఈ విజయాలతో ఆయన అగ్రహీరో స్థానాన్ని కైవసం చేసుకున్నారు.

ఇక ఈ క్రమంలో 2006లో వచ్చిన ‘పోకిరి’ చిత్రం మహేష్ కెరీర్‌లో మైలురాయిగా నిలిచింది. ఈ సినిమా బాక్సాఫీస్ వద్ద సంచలన విజయాన్ని నమోదు చేసింది. మాస్, క్లాస్ అనే భేదం లేకుండా అందరినీ ఆకట్టుకున్న ఈ చిత్రంతో ఆయన స్టార్‌డమ్ అమాంతం పెరిగింది. ఆ తరువాత వచ్చిన ‘దూకుడు, బిజినెస్‌మ్యాన్, శ్రీమంతుడు, భరత్ అనే నేను, సరిలేరు నీకెవ్వరు, ‘మహర్షి, సర్కారు వారి పాట’ వంటి బ్లాక్‌బస్టర్ సినిమాలతో ఇండస్ట్రీలో తన స్థానాన్ని సుస్థిరం చేసుకున్నారు.

తండ్రి వారసత్వాన్ని ముందుకు తీసుకెళ్తున్న మహేష్..

సూపర్ స్టార్ కృష్ణగారు తెలుగు చిత్రసీమకు చేసిన సేవ అమోఘం. ఆయన నటించిన జేమ్స్ బాండ్ తరహా చిత్రాలు, డిటెక్టివ్ సినిమాలు, సామాజికంగా ప్రభావం కలిగించే కథలతో ఎప్పటికీ గుర్తుండే నటుడు. ఆయన తాను నమ్మిన విలువలను, సినిమాల ఎంపికను తన కొడుకు మహేష్ బాబులో నాటిపెట్టారు.

మహేష్ తన తండ్రిని ‘గురువు’గా, ‘ఆదర్శంగా’ భావిస్తారు. ఆయన్ను తలపించేలా సింపుల్‌గా, స్టైలిష్‌గా, విలువలతో కూడిన పాత్రలు పోషించడంలో మహేష్ బాబు కూడా తనదైన ముద్ర వేసుకున్నారు. కృష్ణగారు అల్లూరి సీతారామరాజు లాంటి విభిన్న పాత్రలు చేసినట్లుగానే, మహేష్ కూడా ‘శ్రీమంతుడు, మహర్షి, భరత్ అనే నేను’ వంటి సినిమాల్లో సామాజిక సందేశాలతో ప్రేక్షకులను మెప్పించారు.

అవార్డులు, రివార్డులు, గౌరవాలు..

మహేష్ బాబు నటనకు గాను ఎన్నో అవార్డులు అందుకున్నారు. ఆయన ఎనిమిది నంది అవార్డులు, ఐదు ఫిల్మ్‌ఫేర్ అవార్డులు, మూడు సెనిమా అవార్డులు పొందారు. అంతేకాదు, Times Most Desirable Men జాబితాలో కూడా వరుసగా చోటు దక్కించుకుంటూ వస్తున్నారు.

అభిమానుల కోసం..

మహేష్ బాబు పుట్టినరోజు సందర్భంగా ప్రతి సంవత్సరం ఆయన అభిమానులు రక్తదాన శిబిరాలు, అన్నదాన కార్యక్రమాలు నిర్వహించడం ఆనవాయితీ. అభిమానుల ప్రేమ, అభిమానాన్ని మరింతగా గౌరవించుకునే మహేష్, ప్రతి సంవత్సరంలోనూ కొత్త సినిమాల పోస్టర్లు, అప్‌డేట్స్ ఇవ్వడం ఆనందంగా చేస్తారు.

అప్‌కమింగ్ ప్రాజెక్ట్స్..

ప్రస్తుతం మహేష్ బాబు, దర్శక ధీరుడు ఎస్.ఎస్. రాజమౌళి దర్శకత్వంలో ఓ భారీ పాన్ ఇండియా ప్రాజెక్ట్ కోసం సిద్ధమవుతున్నారు. ఇది ఆయన కెరీర్‌లోనే అద్భుతమైన మైలురాయిగా మిగలనుంది. యాక్షన్, అడ్వెంచర్ నేపథ్యంలో రూపొందుతున్న ఈ చిత్రం కోసం దేశవ్యాప్తంగా అభిమానులు ఆసక్తిగా ఎదురుచూస్తున్నారు.

మహేష్ బాబు ఫౌండేషన్ సేవా కార్యక్రమాలు..

వేదికపై మనసులో మాటలు చెప్పే మహేష్.. ఆఫ్‌ స్క్రీన్‌లో కూడా ఎంతో మానవత్వంతో ఉంటారు. అందుకే సమాజానికి తనవంతు సాయంగా ‘మహేష్ బాబు ఫౌండేషన్’ అనే సేవా సంస్థను స్థాపించి దీనిద్వారా చిన్నారులకు హార్ట్ సర్జరీలు చేయించి, పేదలకు ఆరోగ్య సౌకర్యాలు అందిస్తున్నారు. ఆయన “Heal-a-Child” వంటి చారిటబుల్ సంస్థలతో కలిసి ఎన్నో సేవా కార్యక్రమాల్లో పాల్గొంటున్నారు.

ఒక ప్రైవేట్ హాస్పిటల్‌ భాగస్వామ్యంతో ట్యూమర్‌ బాధిత చిన్నారులకు చికిత్స అందించిన మహేష్ బాబు సేవా మార్గంలో ఆదర్శంగా నిలిచారు. ముఖ్యంగా కిడ్నీ, గుండె సంబంధిత సమస్యలతో బాధపడే చిన్నారులకు ఆయన ఆర్థిక సహాయం చేస్తూ ఎందరికో జీవితం ఇవ్వడం విశేషం. ప్రతి సినిమా విజయానంతరం కొంత సమయం సేవా కార్యక్రమాలకు కేటాయించడం ఆయన ప్రత్యేకత.

ముగింపు..

తెలుగు సినిమా గర్వించదగిన నటుల్లో మహేష్ బాబు ఒకరు. ఆయన నటన, వినయం, సామాజిక సేవ — అన్ని కోణాల్లోనూ ఒక ఆదర్శం. పుట్టినరోజు సందర్భంగా.. హృదయపూర్వక జన్మదిన శుభాకాంక్షలు మహేష్ బాబు గారూ..!

ఆన్‌లైన్ లో మూవీస్ ని వీక్షించేందుకు కింద ఉన్న లింక్స్ ని క్లిక్ చేసి వినోదాన్ని పొందగలరు : 👇

తెలుగు          తమిళ్          కన్నడ          మలయాళం          డబ్ద్ ఫిలిమ్స్