మోహన్ వీరంకి దర్శకత్వంలో రాజ్ తరుణ్, వర్షా బొల్లమ్మ జంటగా నటిస్తున్న ఫీల్ గుడ్ రొమాంటిక్ కామెడీ మూవీ ‘స్టాండప్ రాహుల్’. ఈసినిమాను డ్రీమ్ టౌన్ ప్రొడక్షన్స్ మరియు హైఫైవ్ పిక్చర్స్ పతాకాలపై నంద్కుమార్ అబ్బినేని, భరత్ మగులూరి సంయుక్తంగా నిర్మిస్తుండగా నేడు ఈసినిమా ప్రేక్షకుల ముందుకు వచ్చింది. మరి ఈసినిమా ఎంతవరకూ ప్రేక్షకులకు నచ్చింది.. ఎలాంటి టాక్ ను సొంతం చేసుకుంది అన్నది తెలియాలంటే రివ్యూ లోకి వెళ్లాల్సిందే.
మీకు నచ్చిన మరియు మీరు మెచ్చిన లేటెస్ట్ తెలుగు మూవీస్ ని ఇక్కడ వీక్షించగలరు:
లేటెస్ట్ తెలుగు మూవీస్
నటీనటులు.. రాజ్ తరుణ్, వర్షా బొల్లమ్మ, వెన్నెల కిషోర్, మురళీ శర్మ, ఇంద్రజ
దర్శకత్వం..మోహన్ వీరంకి
బ్యానర్స్..డ్రీమ్ టౌన్ ప్రొడక్షన్స్, హైఫైవ్ పిక్చర్స్
నిర్మాతలు..నంద్కుమార్ అబ్బినేని, భరత్ మగులూరి
సంగీతం..స్వీకర్ అగస్తి
సినిమాటోగ్రఫి.. శ్రీరాజ్ రవీంద్రన్
కథ..
రాహుల్ (రాజ్ తరుణ్)కి స్టాండప్ కమెడియన్ కావాలనేది కోరిక. కానీ తల్లి ఇంద్రజకు అలాంటివి ఇష్టం ఉండదు. మంచి జాబ్ చూసుకొని తన కొడుకు కెరీర్ లో సెట్ అవ్వాలని అనుకుంటుంది. ఇక తల్లి మాటప్రకారం ఒక కంపెనీలో జాబ్ జాయిన్ అవుతాడు రాహుల్. అదే కంపెనీలో రాహుల్ స్కూల్ మేట్ శ్రేయ(వర్ష) పని చేస్తూ ఉంటుంది. ఈ క్రమంలో ఇద్దరూ ప్రేమలో పడతారు. ఇక ఇద్దరూ సహ జీవనం మొదలు పెడతారు. ఈ క్రమంలో రాహుల్ ప్రేమ, పెళ్లి, కెరీర్ వంటి విషయాల్లో ఇబ్బందులు ఎదుర్కొంటాడు. తన ప్యాషన్ అయిన స్టాండప్ కామెడీలో అతడు సక్సెస్ అయ్యాడా? ప్రేమించిన శ్రేయను దక్కించుకున్నాడా? అనేది మిగతా కథ..
విశ్లేషణ..
ప్రస్తుతం రాజ్ తరుణ్ కు మంచి హిట్ కావాల్సిందే. చాలా కాలంగా మంచి హిట్ కోసం ఎదురుచూస్తున్నా కూడా రాజ్ తరుణ్ కు సాలిడ్ హిట్ వచ్చి చాలా కాలమైపోతుంది. వరుసగా సినిమాలు చేసుకుంటూ వెళుతున్నా కూడా ఈ యంగ్ హీరోకు మాత్రం ఎందుకో సరైన హిట్ పడట్లేదు. ఇక ఈసారి మరో డిఫరెంట్ స్టోరీతో వచ్చాడు. స్టాండప్ కామెడీ ఈ నేపథ్యంలో తెలుగు సినిమాలు తక్కువ వచ్చాయి. రీసెంట్ గా వచ్చిన ‘మోస్ట్ ఎలిజిబుల్ బ్యాచ్లర్’ సినిమాలో పూజా హెగ్డే స్టాండప్ కమెడియన్గా కనిపించారు తప్పా ఫుల్ లెంగ్త్ లో ఒక హీరో చేసిన సినిమాలు లేవు. తెలుగులో ఒక హీరో స్టాండప్ కమెడియన్ రోల్ చేయడం బహుశా ‘స్టాండప్ రాహుల్’ సినిమాతో మొదలైందని చెప్పవచ్చు.
ఇక ఒక రకంగా ఇలాంటి పాత్రలు చేయాలంటే కాస్త రిస్క్ అనే చెప్పాలి. ఎందుకంటే కమర్షియల్ సినిమాలు అంటే యాక్షన్ ఎలిమెంట్స్, హీరో ఎలివేషన్ ఎలిమెంట్స్ తో సినిమా నడిచేస్తుంది. అందులో హీరో ఎలా చేసినా స్క్రీన్ పై బాగానే కనిపిస్తుంది. కానీ ఇలాంటి పాత్రలు చేయాలంటే మాత్రం కష్టం. కూల్ గా కామ్ గా నిలబడి జోక్స్ తో నవ్వించాలి. ఆ పాత్ర ఆడియన్స్ కు కనెక్ట్ అవ్వాలి. ఇక ఇలాంటి పాత్రలోనే ప్రయోగం చేయడానకిి రాజ్ తరుణ్ ఒప్పుకున్నాడంటేనే తన ధైర్యాన్ని మెచ్చుకోవాలి. ఇక డైరెక్టర్ కూడా కేవలం స్టాండప్ కామెడీని మాత్రమే కాకుండా.. తల్లిదండ్రుల ప్రభావం పిల్లల మీద ఎంత ఉంటుంది అనేది కూడా చూపించారు. అటు కామెడీని, మరోపక్క ఎమోషన్ ను కూడా చూపించగలిగాడు డైరెక్టర్.
రాజ్ తరుణ్ నటన గురించి ప్రత్యేకంగా చెప్పనక్కర్లేదు. తనలో కామెడీ యాంగిల్ ను తన కెరీర్ మొదట్లోనే చూపించాడు. ఇక ఈసినిమాలో కూడా ఎప్పటిలానే తన జోవియల్ నటనతో ఆకట్టుకున్నాడు. మేకోవర్ పర్వాలేదు అనిపిస్తుంది. అక్కడక్కడ ఎమోషనల్ సీన్స్ లో బాగానే చేశాడు. వర్ష బొల్లమ్మ పాత్ర ఆకట్టుకుంటుంది. ఇక వెన్నెల కిశోర్ ఉన్నంతసేపు తన కామెడీతో నవ్వించే ప్రయత్నం చేశాడు. సినిమాలో ఇంద్రజ పాత్ర ఆకట్టుకుంటుంది. ఆమె స్క్రీన్ ప్రెజెన్స్ కూడా మెప్పిస్తుంది. ఇక మిగిలిన నటీనటులు తమ పాత్రల మేర నటించారు.
ఇక ఈసినిమాలో ప్రధాన ఆకర్షణ సినిమాటోగ్రఫి అని చెప్పొచ్చు. సినిమాటోగ్రఫి మాత్రం చాలా బాగా ఉంది. చాలా ఫ్రెష్ ఫీలింగ్ వస్తుంది. శ్రీకర్ అగస్తీ పాటలు, నేపథ్య సంగీతం పర్వాలేదు. నిర్మాణ విలువలు బాగున్నాయి.
ఓవరాల్ గా చెప్పాలంటే కామెడీ ఎంటర్ టైన్ మెంట్ సినిమాలు ఇష్టపడేవారికి, రాజ్ తరుణ్ ఫ్యాన్స్ కు ఈసినిమా నచ్చుతుంది.
[subscribe]
మీకు ఇష్టమైన మూవీస్ ని ఆన్ లైన్ లో చూసి ఆనందించగలరు: