సురేష్ ప్రొడ‌క్ష‌న్స్‌కి క‌లిసొస్తున్న మ‌హిళా ద‌ర్శ‌కులు

విజ‌య‌వంత‌మైన చిత్రాల‌కు చిరునామాగా నిల‌చిన నిర్మాణ సంస్థ సురేష్ ప్రొడ‌క్ష‌న్స్‌. భార‌తీయ చిత్ర ప‌రిశ్ర‌మ‌లోని ప‌లు భాష‌ల్లో సినిమాల‌ను నిర్మించిన ఈ స‌క్సెస్‌ఫుల్ ప్రొడ‌క్ష‌న్ హౌస్‌… మ‌హిళా ద‌ర్శ‌కుల‌తో సినిమాలు నిర్మించిన‌ సంద‌ర్భాలు మాత్రం త‌క్కువనే చెప్పాలి. అయితే, ఈ సంస్థ మ‌హిళా ద‌ర్శ‌కుల‌తో సినిమాలు రూపొందించిన రెండు సంద‌ర్భాల్లోనూ విజ‌యాలు ద‌క్క‌డం విశేష‌మ‌నే చెప్పాలి.

ఐదేళ్ళ క్రితం న‌ట‌ద‌ర్శ‌కురాలు శ్రీ‌ప్రియ డైరెక్ష‌న్‌లో `దృశ్యం` చిత్రాన్ని నిర్మించి ఘ‌న‌విజ‌యం అందుకున్న సురేష్ ప్రొడ‌క్ష‌న్స్‌… మ‌ళ్ళీ ఇప్పుడు `ఓ బేబీ`తో ఆ ప‌రంప‌ర‌ని కొన‌సాగించింది. నందినీరెడ్డి ద‌ర్శ‌క‌త్వంలో తెర‌కెక్కిన ఈ సినిమా… ప్ర‌స్తుతం విజ‌య‌ప‌థంలో ప‌య‌నిస్తోంది. మొత్తానికి… శ్రీ‌ప్రియ‌, నందినీ రెడ్డి రూపంలో సురేష్ ప్రొడ‌క్ష‌న్స్‌కి మ‌హిళా ద‌ర్శ‌కులు క‌లిసొచ్చిన వైనం… మున్ముందు కూడా కొన‌సాగుతుందేమో చూడాలి.