‘సరిలేరు నీకెవ్వరు’లో విజ‌య‌శాంతి పాత్ర డిటైల్స్‌?

లేడీ సూపర్ స్టార్ విజయశాంతి… దాదాపు పాతికేళ్ళ పాటు ప‌లు వైవిధ్యభ‌రిత‌మైన పాత్రల్లో నటించి తన అస‌మాన అభిన‌యంతో ప్రేక్షకులను అల‌రించిన నిన్న‌టి త‌రం కథానాయిక. పాలిటిక్స్‌లోకి ఎంట్రీ ఇచ్చిన తర్వాత సినిమాలకు దూరమైన ఈ సీనియర్ నటీమణి… సూపర్ స్టార్ మహేష్ బాబు కథానాయకుడిగా తెరకెక్కుతున్న ‘సరిలేరు నీకెవ్వరు’తో రీ-ఎంట్రీ ఇవ్వనున్న సంగతి తెలిసిందే. కాగా… ఈ సినిమాలో విజయశాంతి పాత్ర తీరు తెన్నులపై కొన్ని ఆస‌క్తిక‌ర‌మైన వార్తలు టాలీవుడ్ సర్కిల్స్‌లో చక్కర్లు కొడుతున్నాయి.

ఆ వివరాల్లోకి వెళితే… సక్సెస్‌ఫుల్ డైరెక్టర్ అనిల్ రావిపూడి దర్శకత్వంలో రూపొందుతున్న ఈ హిలేరియ‌స్ ఎంటర్‌టైనర్‌లో… సమాజ శ్రేయ‌స్సు కోసం ప‌రిత‌పించే ఓ పవర్‌ఫుల్ ఫ్యాక్షన్ లీడర్‌గా కనిపించనుందట ఈ లేడీ సూపర్ స్టార్. అంతేకాదు… తనను నమ్మిన ప్రజలను, తన ఊరిని ఓ నరరూప రాక్షసుడు (జగపతిబాబు) నుంచి కాపాడటం కోసం… తప్పనిసరి పరిస్థితుల్లో కత్తి కూడా పట్టాల్సి వస్తుందట. ఇలా… ఒక గృహిణిగా, తల్లిగా, నలుగురి మంచి కోరే ఒక మహిళగా… త్రీ షేడ్స్ ఉన్న ఓ డిఫ‌రెంట్ క్యారెక్టర్‌లో రాములమ్మ దర్శనమివ్వబోతున్నట్టు సమాచారం. అయితే… ఈ క‌థ‌నాల్లో నిజమెంతో తెలియాలంటే మరి కొంతకాలం వేచి ఉండాల్సిందే.

‘దిల్’ రాజు, అనిల్ సుంకర, మహేష్ బాబు నిర్మాత‌లుగా వ్య‌వ‌హ‌రిస్తున్న స‌రిలేరు నీకెవ్వ‌రు… 2020 సంక్రాంతికి ప్రేక్షకుల ముందుకు రానుంది.