వివాహ బంధంతో ఒక్కటవుతున్న స్టార్స్

గత ఏడాది సోనమ్ కపూర్, దీపికా పదుకొనే, ప్రియాంక చోప్రా ల పెళ్లిళ్లతో సందడిగా గడిపోయింది. ఇక ఈ ఏడాది ప్రారంభంలో ఇద్దరు స్టార్స్ వివాహబంధంతో ఒకటి కాబోతున్నట్టు తెలుస్తోంది. ఇంతకీ ఆ స్టార్స్ ఎవరనుకుంటున్నారా? ఎవరో కాదు అఖిల్ సినిమాతో తెలుగు తెరకు పరిచయమైన సయేషా సైగల్, వరుడు , సైజ్ జీరో, ఒక రాజు ఒక రాణి వంటి చిత్రాల‌తో తెలుగు ప్రేక్ష‌కుల‌కి ద‌గ్గ‌రైన హీరో ఆర్య‌. వీరిద్దరూ త్వరలో పెళ్లి పీటలెక్కబోతున్నట్టు సమాచారం. మార్చి 9, 10 తేదీల‌లో వీరి వివాహం జ‌ర‌గ‌నుంద‌ని.. హైద‌రాబాద్‌లో ఆర్య‌, స‌యేషాల పెళ్లి వేడుక జ‌ర‌ప‌నుండ‌గా, చెన్నైలో గ్రాండ్ రిసెప్ష‌న్ ఏర్పాటు చేస్తార‌ని టాక్.

కాగా 2018లో వ‌చ్చిన గ‌జినీకాంత్ అనే చిత్రంలో వీరిద్ద‌రు క‌లిసి న‌టించారు. ఈ చిత్రం ద్వారా ఏర్పడిన పరిచయంతో వీరిద్దరి మధ్య స్నేహం ఏర్పడినట్టు తెలుస్తోంది. ఇక ఇరు కుటుంబాల సభ్యులు గ్రీన్ సిగ్నల్ ఇవ్వడంతో.. ఫ్రెండ్స్‌గా ఉన్న వీరిద్ద‌రు పెళ్లి బంధంతో ఒక్క‌టి కానున్నట్టు సమాచారం.

ఇదిలా ఉండగా హిందీలో శివాయ్ అనే చిత్రంతో ఆరంగేట్రం చేసిన స‌యేషా ప్ర‌ముఖ న‌టులు సుమీత్ సైగల్ మరియు షాహీన్‌ల కూతురు కాగా, దిలీప్ కుమార్, సైరా భానుల మ‌న‌వ‌రాలు అన్న సంగ‌తి తెలిసిందే. ప్ర‌స్తుతం సూర్య‌-కేవీ ఆనంద్ ద‌ర్శ‌క‌త్వంలో తెర‌కెక్కుతున్న క‌ప్పం చిత్రంలో వీరిద్దరూ న‌టిస్తున్నారు. ఇందులో మోహ‌న్ లాల్ కూడా ముఖ్య పాత్ర పోషిస్తున్నాడు.