య‌న్టీఆర్ `శ్రీ వేంక‌టేశ్వ‌ర మ‌హాత్మ్యం`కి 60 వ‌సంతాలు

ఆంధ్రుల‌ ఆరాధ్య దైవం శ్రీ వేంక‌టేశ్వ‌ర స్వామి పాత్ర‌లో తెలుగువారి న‌ట‌దైవం నంద‌మూరి తార‌క రామారావు జీవించిన చిత్రం `శ్రీ వెంక‌టేశ్వ‌ర మ‌హాత్మ్యం`. అల‌నాటి అగ్ర‌శ్రేణి ద‌ర్శ‌కుడు పి.పుల్ల‌య్య రూపొందించిన ఈ చిత్రరాజంలో ల‌క్ష్మీ దేవి పాత్ర‌ను ఎస్. వ‌ర‌ల‌క్ష్మి ధ‌రించ‌గా, ప‌ద్మావ‌తి పాత్ర‌ను సావిత్రి పోషించారు. `ప‌ద్మ‌శ్రీ వారి` ప‌తాకంపై వి.వేంక‌టేశ్వ‌ర్లు ప్ర‌తిష్ఠాత్మ‌కంగా నిర్మించిన ఈ మైథ‌లాజిక‌ల్ ఫిల్మ్ లో చిత్తూరు వి. నాగ‌య్య‌, శాంత కుమారి, గుమ్మ‌డి, షావుకారు జాన‌కి, రుష్యేంద్ర‌మ‌ణి, రాజ‌నాల‌, రేలంగి, ర‌మ‌ణారెడ్డి త‌దిత‌రులు ఇత‌ర ముఖ్య పాత్ర‌ల్లో న‌టించారు.

ఆచార్య ఆత్రేయ క‌థ‌నం, సంభాష‌ణ‌లు అందించిన ఈ ఆధ్యాత్మిక చిత్రానికి దిగ్గ‌జ స్వ‌ర‌క‌ర్త పెండ్యాల నాగేశ్వ‌ర‌రావు బాణీలు అందించారు. ఇందులోని అన్ని పాట‌లూ విశేషాద‌ర‌ణ పొందాయి. మ‌రీ ముఖ్యంగా లెజెండ‌రీ సింగ‌ర్, మ్యూజిక్ కంపోజ‌ర్ ఘంట‌సాలపై చిత్రీక‌రించిన `శేష‌శైలా వాస‌` గీత‌మైతే నిత్య‌నూత‌నంగా నిల‌చింది. థియేట‌ర్ల‌ను దేవాల‌యాలుగా మార్చివేసిన `శ్రీ వేంక‌టేశ్వ‌ర మ‌హాత్మ్యం`.. 1960 జ‌న‌వ‌రి 9న విడుద‌లైంది. అంటే.. నేటితో ఈ జ‌న‌రంజ‌క చిత్రం జ‌నం ముందుకొచ్చి 60 వ‌సంతాలు పూర్త‌వుతున్నాయ‌న్న‌మాట‌.