అమ్మ బయోపిక్ లో బాలీవుడ్ క్వీన్

తమిళనాడు దివంగత ముఖ్యమంత్రి జయలలితగారి జీవితం ఆధారంగా ఇప్పటికే పలువురు డైరెక్టర్లు ఆమె బయోపిక్ తీస్తున్నట్టు ప్రకటించిన సంగతి తెలిసిందే. వారిలో తమిళ దర్శకుడు ఏ ఎల్ విజయ్ ‘తలైవి’ అనే టైటిల్ తో బయోపిక్ ను తెరకెక్కిస్తున్న సంగతి కూడా విదితమే. అయితే ఈయన బయోపిక్ లో జయలలిత గా ఎవరు కనిపిస్తారబ్బా అని అందరూ అనుకుంటుండగా.. అశ్చర్యంగా ఎవరూ ఊహించని విధంగా ఆ అవకాశం బాలీవుడ్ క్వీన్ కు దక్కింది. ఈ బయోపిక్ లో జయలలిత గా కంగనా రనౌత్ నటిస్తుంది. ఈరోజు ఆమె పుట్టిన రోజు సందర్భంగా ఈ ప్రకటన చేశారు విజయ్. తెలుగు, తమిళం, హిందీ భాషల్లో ఈ బయోపిక్ తెరకెక్కనున్నట్టు తెలుస్తోంది.

కాగా విబ్రి, కర్మ మీడియా ఎంటర్‌టైన్మెంట్ బ్యానర్‌పై విష్ణు వర్ధన్ ఇందూరి, శైలేష్ ఆర్ సింగ్ ఈ చిత్రాన్ని నిర్మించనున్నారు. అంతేకాదు మణికర్ణికకు స్క్రిప్టు అందించిన విజయేంద్ర ప్రసాదే ఈసినిమాకు కూడా కథను అందించనున్నారు. త్వరలోనే ఈ సినిమా సెట్స్ పైకి వెళ్లనుంది.

మరి జయలలిత లాంటి డైనమిక్ మహిళ పాత్రలో కంగనా నటించడం హర్షించదగ్గ విషయమే. మరి ఓవైపు ప్రియదర్శిని దర్శకత్వంలో నిత్యామీనన్ ప్రధాన పాత్రలో ‘ఐరన్ లేడీ’ పేరుతో జయలలిత బయోపిక్
కూడా తెరకెక్కుతోంది. మరి చూద్దాం… వీరిలో ఎవరు అమ్మ పాత్రకు ఎక్కువ న్యాయం చేస్తారో..?