సీఎం రేవంత్ రెడ్డిని కలిసిన దిల్ రాజు, నాగవంశీ
Tollywood Star Producers Dil Raju and Naga Vamsi Meets CM Revanth Reddy

తెలంగాణలో ఇటీవల కురిసిన ఎడతెరిపిలేని వర్షాల కారణంగా అనేక ప్రాంతాల్లో భారీ వరదలు ముంచెత్తిన విషయం తెలిసిందే. వీరిని ఆదుకునేందుకు రాష్ట్ర ప్రభుత్వం సహాయక కార్యక్రమాలను చేపట్టింది. ఈ నేపథ్యంలో వరద బాధితుల సహాయార్థం పలువురు సినీ ప్రముఖులు భారీ విరాళాలను ప్రకటించారు. ఈ క్రమంలో తాజాగా బుధవారం ఆంధ్రప్రదేశ్ ఉప ముఖ్యమంత్రి పవన్ కళ్యాణ్ సీఎం రేవంత్ రెడ్డిని కలుసుకుని రూ.1 కోటి అందించారు.
ఇక ప్రముఖ నిర్మాతలు దిల్ రాజు మరియు సూర్యదేవర నాగవంశీ కూడా ముఖ్యమంత్రి సహాయ నిధికి రూ.25 లక్షలు చొప్పున అందించారు. ఈ భారీ విరాళానికి సంబంధించిన చెక్కులను వారు తాజాగా సీఎం రేవంత్ రెడ్డిని కలిసి అందించారు. అలాగే అక్కినేని కుటుంబం తరపున సుప్రియా యార్లగడ్డ కూడా రూ.1 కోటి అందించారు. ఇక ఈ సందర్భంగా వరద బాధితులను ఆదుకోవడంలో స్పందించి ప్రభుత్వానికి అండగా నిలిచినందుకు వీరిని ముఖ్యమంత్రి అభినందించారు.







