ఒకే సీజన్లో వస్తున్న రజినీ, ధనుష్
Rajinikanth & Dhanush Movies Set To Release For Festive Season
తమిళనాట 2020 సంక్రాంతి రసవత్తరంగా మారింది. ఎందుకంటే... నిజజీవితంలో మామాఅల్లుళ్ళు అయిన ఇద్దరు అగ్ర కథానాయకులు... పొంగల్ సీజన్లో తమ తమ కొత్త సినిమాలతో బాక్సాఫీస్ వద్ద క్లాష్ కి సై అంటున్నారు. ఆ మామాఅల్లుళ్ళు మరెవరో కాదు... సూపర్ స్టార్ రజినీకాంత్, టాలెంటెడ్ యాక్టర్ ధనుష్.
ఆ వివరాల్లోకి వెళితే... సుదీర్ఘ విరామం తరువాత రజినీకాంత్ పోలీస్ ఆఫీసర్ గా నటించిన చిత్రం `దర్బార్`. ఎ.ఆర్. మురుగదాస్ రూపొందించిన ఈ యాక్షన్ ఎంటర్టైనర్ 2020 పొంగల్ కానుకగా జనవరి 9న విడుదల కానుంది. కట్ చేస్తే... అదే సీజన్ లో ధనుష్ నటించిన `పట్టాసు’ కూడా రిలీజ్ కాబోతుందని కోలీవుడ్ టాక్. దురై సెంథిల్ కుమార్ దర్శకత్వం వహించిన ఈ చిత్రంలో ధనుష్ తండ్రీకొడుకులుగా రెండు విభిన్న పాత్రల్లో దర్శనమివ్వనున్నాడు.
మరి... ఒకే సీజన్లో ప్రేక్షకుల ముందుకు రానున్న ఈ మామాఅల్లుళ్ళు... ఆ యా క్రేజీ ప్రాజెక్ట్స్తో బాక్సాఫీస్ వద్ద ఎటువంటి సంచలనాలు సృష్టిస్తారో చూడాలి.




