ఆర్ ఆర్ ఆర్ నాటు నాటు సాంగ్ కు బొమ్మ డ్యాన్స్
Anand Mahindra Shares Puppet Dance Video On Naatu Naatu Song

స్టార్ డైరెక్టర్ రాజమౌళి దర్శకత్వంలో రామ్ చరణ్, ఎన్టీఆర్ హీరోలుగా భారీ బడ్జెట్, భారీ తారాగణంతో తెరకెక్కిన ఆర్ఆర్ఆర్ మూవీ ఘనవిజయం సాధించింది. సంగీత దర్శకుడు కీరవాణి స్వరకల్పనలో చంద్ర బోస్ రచన, రాహుల్ సిప్లిగంజ్, కాలభైరవ ఆలపించిన, ప్రేమ్ రక్షిత్ కొరియోగ్రఫీలో హీరోలు రామ్ చరణ్, ఎన్టీఆర్ అద్భుతంగా డ్యాన్స్ పెర్ఫార్మ్ చేసిన నాటు నాటు సాంగ్ ప్రపంచవ్యాప్తంగా ప్రేక్షకులను ఆకట్టుకున్న విషయం తెలిసిందే. మార్చి 12, 2023 న జరిగిన ఆస్కార్ అవార్డు వేడుకలో బ్లాక్ బస్టర్ ఆర్ఆర్ఆర్ మూవీలోని నాటు నాటు పాట, బెస్ట్ ఒరిజినల్ సాంగ్ విభాగంలో ఆస్కార్ అవార్డ్ గెలుచుకుంది.
ఆర్ఆర్ఆర్ చిత్రంలోని నాటు నాటు సాంగ్ కు ప్రపంచవ్యాప్తంగా క్రేజ్ వచ్చిన విషయం తెలిసిందే. పలువురు ఈ సాంగ్ కు రీల్స్ చేసి ప్రేక్షకులను అలరిస్తున్నారు. ఇప్పటి వరకు నాటు నాటు పాటకు జనం స్టెప్పులేయడం చూసుంటారు.. కానీ ఓ బొమ్మ అదిరిపోయే రీతిలో నాటు నాటు స్టెప్పులేసింది. కీలుబొమ్మలాటలో మాదిరిగా చిన్న కర్రలకు దారాలు కట్టిన బొమ్మతో ఓ మహిళ అద్భుతంగా డ్యాన్స్ చేయించారు. కర్రలను కదుపుతూ బొమ్మ చేత నాటు నాటు ఐకానిక్ స్టెప్పును వేయించారు. నిజంగా ఈ వీడియోను చూస్తే ఆమె కళను అభినందించాల్సిందే. బొమ్మ కాళ్లు, చేతులు పాటకు తగినట్లుగా సింక్ చేయిస్తూ అద్భుతంగా స్టెప్పులేయించారు. ఆ వీడియో ను ప్రముఖ వ్యాపారవేత్త ఆనంద్ మహీంద్రా సోషల్ మీడియా లో షేర్ చేయగా ప్రేక్షకులను విశేషంగా ఆకట్టుకుంది.







