మొత్తానికి చిరంజీవి వరుసపెట్టి సినిమాలను లైన్ లో పెడుతున్నాడు. ఇప్పటికే ఆచార్య సినిమాను పూర్తి చేసిన చిరు వెంటనే గ్యాప్ తీసుకోకుండా లూసిఫర్ రీమేక్ ను పట్టాలెక్కించేశాడు. ఈసినిమా షూటింగ్ జరుగుతూ ఉంది. ఇక వెంటనే మరో సినిమాను కూడా మొదలుపెట్టడానికి చూస్తున్నాడు. మోహన్ రాజా తో లూసిఫర్ తో పాటు బాబి దర్శకత్వంలో అలాగే మెహర్ రమేష్ దర్శకత్వంలో కూడా మరో సినిమా చేస్తున్న సంగతి తెలిసిందే కదా.
ఇక రేపు మెగాస్టార్ పుట్టిన రోజు కావడంతో ఇక మేకర్స్ వరుస పెట్టి అప్ డేట్స్ ఇవ్వడానికి రెడీ అయ్యారు. ఈ నేపథ్యంలోనే చిరు 154 సినిమాకు సంబంధించిన అప్ డేట్ ఇవ్వనున్నట్టు ప్రకటించారు. బాబి దర్శకత్వంలో వస్తున్న ఈసినిమాను మైత్రీ మూవీ మేకర్స్ వారు నిర్మిస్తున్నారు. ఈనేపథ్యంలోనే మైత్రీ మూవీ మేకర్స్ తమ అధికారిక ట్విట్టర్ ద్వారా రేపు సాయంత్రం నాలుగు గంటల ఐదు నిమిషాలకు మెగా వేవ్ రాబోతోందని తెలిపారు. ఇక ఈ సినిమాకు దేవీ శ్రీ ప్రసాద్ సంగీతాన్ని అందిస్తున్నాడు.
ఇక ఈసినిమాతో పాటు ఏకే ఎంటర్టైన్మెంట్స్ వారు కూడా మరో సినిమాకు సంబంధించి ఒక అప్ డేట్ ఇచ్చారు. మెహర్ రమేష్ దర్శకత్వం వహిస్తున్న ఈసినిమాకు సంబంధించిన అప్ డేట్ రేపు ఉదయం 9 గంటలకు రానున్నట్టు ప్రకటించారు.