సూర్య సినిమాలో విలన్గా గోపీచంద్ ?.. క్లారిటీ ఇచ్చిన టీం
Gopichand to Play Villain in Suriya’s Film? Team Gives Clarity

కోలీవుడ్ స్టార్ హీరో సూర్య తదుపరి చిత్రంలో టాలీవుడ్ హీరో గోపీచంద్ విలన్గా నటిస్తున్నారంటూ సోషల్ మీడియాలో జోరుగా ప్రచారం సాగింది. ‘డీసీ’ ఫేమ్ అరుణ్ మాథేశ్వరన్ దర్శకత్వంలో సూర్య నటించనున్న ‘సూర్య 49’ చిత్రంలో గోపీచంద్ ప్రతినాయకుడిగా కనిపిస్తారన్న వార్త వైరల్ కావడంతో, ఈ రూమర్లపై గోపీచంద్ టీమ్ స్పందించి క్లారిటీ ఇచ్చింది. తమ హీరో తమిళ సినిమాలో విలన్గా నటిస్తున్నారన్న వార్తల్లో ఎలాంటి నిజం లేదని, అవి పూర్తిగా అవాస్తవాలని స్పష్టం చేసింది.
‘జయం’, ‘వర్షం’ వంటి చిత్రాల్లో నెగటివ్ షేడ్స్ ఉన్న పాత్రలతో మెప్పించిన గోపీచంద్, మరోసారి విలన్ పాత్రలో కనిపించబోతున్నారంటూ సోషల్ మీడియాలో పోస్టులు చక్కర్లు కొట్టాయి. అంతేకాకుండా ఆ ప్రాజెక్ట్లో రియా షిబు, అనిరుధ్ రవిచందర్, జగరం స్టూడియోస్ వంటి పేర్లను కూడా జోడిస్తూ ప్రచారం చేశారు. అయితే ఈ వార్తలపై స్పందించిన గోపీచంద్ టీమ్, ఇలాంటి తప్పుడు కథనాలను ప్రచారం చేయవద్దని మీడియా, సోషల్ మీడియా హ్యాండిల్స్ను కోరింది. గోపీచంద్ కొత్త ప్రాజెక్ట్లకు సంబంధించిన అధికారిక ప్రకటనలు ఎప్పటికప్పుడు ఆయన అఫీషియల్ హ్యాండిల్స్ ద్వారానే వస్తాయని వెల్లడించింది.
మరోవైపు సూర్య ప్రస్తుతం ‘జై భీమ్’ దర్శకుడు టీజే జ్ఞానవేల్తో చేస్తున్న సినిమా పనుల్లో బిజీగా ఉన్నారు. ఆ తర్వాత అరుణ్ మాథేశ్వరన్తో ప్రాజెక్ట్ పట్టాలెక్కే అవకాశం ఉంది. అయితే ఈ సినిమా తారాగణం, సాంకేతిక బృందంపై మేకర్స్ ఇంకా అధికారిక ప్రకటన చేయలేదు. కాబట్టి సోషల్ మీడియాలో వినిపిస్తున్న పేర్లు, వివరాలను ప్రస్తుతం అవాస్తవాలుగానే పరిగణించాల్సి ఉంటుంది.
వీడియోస్










