సీఎం రేవంత్ రెడ్డిని కలిసిన టాలీవుడ్ స్టార్ డైరెక్టర్స్
TFI Directors Meets Telangana CM Revanth Reddy

తెలుగు ఫిల్మ్ డైరెక్టర్స్ డే మే 19న జరుగనున్న విషయం తెలిసిందే. ఘనంగా నిర్వహించనున్న ఈ వేడుకకు హైదరాబాద్లోని ఎల్బీ స్టేడియం వేదిక కానుంది. ఈ కార్యక్రమంలో పాల్గొనవలసిందిగా ఇండస్ట్రీకి చెందిన మెగాస్టార్ చిరంజీవి, వెంకటేష్, ప్రభాస్, నాగచైతన్య సహా అగ్ర హీరోలు అందరికీ ఇప్పటికే ఆహ్వానాలు అందాయి. ఈ క్రమంలో తెలుగు చిత్ర పరిశ్రమకు చెందిన పలువురు దర్శకులు తాజాగా తెలంగాణ రాష్ట్ర ముఖ్యమంత్రి రేవంత్ రెడ్డిని కలిశారు. ఈ మేరకు శనివారం టీఎఫ్డీఏ ప్రతినిధులు సీఎం రేవంత్ రెడ్డిని ఆయన నివాసంలో మర్యాదపూర్వకంగా కలిశారు.
ముఖ్యమంత్రి రేవంత్ రెడ్డిని కలిసినవారిలో దర్శకుల సంఘం అధ్యక్షుడు వీరశంకర్, రామ్ గోపాల్ వర్మ, అనిల్ రావిపూడి, హరీష్ శంకర్, వశిష్ట మల్లిడి తదితర డైరెక్టర్లు ఉన్నారు. ఈ సందర్భంగా ఆదివారం నిర్వహించనున్న డైరెక్టర్స్ డే కార్యక్రమానికి రావాల్సిందిగా సీఎం రేవంత్ రెడ్డికి ఆహ్వానం అందించారు. కాగా టాలీవుడ్ దివంగత దిగ్గజ దర్శకుడు దాసరి నారాయణరావు జన్మదినం సందర్భంగా.. ప్రతి ఏటా మే 4న దర్శకుల దినోత్సవం నిర్వహిస్తున్న విషయం తెలిసిందే. అయితే ఈ ఏడాది కొన్ని అనివార్య కారణాల వల్ల ఆ కార్యక్రమం మే 19కి వాయిదా పడింది. ఈ నేపథ్యంలో రేపు సాయంత్రం 6 గంటలకు తెలుగు ఫిల్మ్ డైరెక్టర్స్ డే వేడుక జరుగనుంది.







