ప్రేక్షకులను తప్పితే తాను ఎవ్వరినీ మోసం చేయలేదు - పూరి జగన్నాథ్
Puri Jagannadh pens an emotional note after liger failure

పూరి కనెక్ట్స్ , ధర్మా ప్రొడక్షన్స్ బ్యానర్స్ పై పూరి జగన్నాథ్ దర్శకత్వంలో క్రేజీ హీరో విజయ్ దేవరకొండ, అనన్య పాండే జంటగా బాక్సింగ్ నేపథ్యం లో తెలుగు , హిందీ భాషలలో తెరకెక్కిన పాన్ ఇండియా మూవీ లైగర్ ఆగస్ట్ 25 వ తేదీ రిలీజ్అయ్యింది. లెజెండరీ బాక్సర్ మైక్ టైసన్ , మకరంద దేశ్ పాండే , రమ్యకృష్ణ ముఖ్య పాత్రలలో నటించారు. తనీష్ బాగ్చి సంగీతం అందించగా , మణిశర్మ బ్యాక్ గ్రౌండ్ స్కోర్ అందించారు. ఈ మూవీ కై విజయ్ మార్షల్ ఆర్ట్స్ లో ట్రైనింగ్ తీసుకున్నారు. లైగర్ మూవీ ప్రేక్షకుల అంచనాలను అందుకోలేకపోయింది. ఈ సినిమా వల్ల నష్టపోయిన డిస్ట్రిబ్యూటర్స్ తమ నష్టాలను భరించాలని పూరి జగన్నాథ్ ను బెదిరిస్తున్నారు. దీనిపై పూరీ పోలీసులకు ఫిర్యాదు కూడా చేశారు. ఈ వివాదం నేపథ్యంలో పూరీ ఆదివారం ఓ లేఖ విడుదల చేశారు.
విజయం, అపజయం, జీవితం శాశ్వతం కాదనీ , ప్రతి సంఘటనని మనం అనుభవంలానే చూడాలనీ , లైఫ్ లో రిస్క్ చెయ్యకపోతే అది జీవితమే కాదనీ ,తన మీద నమ్మకంతో టికెట్ కొని సినిమాకు వచ్చిన ప్రేక్షకులను తప్పితే తాను ఎవ్వరినీ మోసం చేయలేదనీ , మళ్లీ ఇంకో సినిమా తీస్తాననీ , కచ్చితంగా ఎంటర్ టైన్ చేస్తాననీ , జీవితంలో చివరగా అందరూ కలిసేది శ్మశానంలోనే అనీ , మధ్యలో జరిగేది అంతా డ్రామా అనీ జీవిత సత్యం వివరిస్తూ పూరి జగన్నాథ్ ఆ లేఖ లో వ్రాశారు.








