‘సిసింద్రీ’ త‌ర్వాత మ‌రోసారి అఖిల్‌కి అమ్మ‌గా ఆమ‌ని?

“చిన్ని తండ్రి నిను చూడగా… వేయి కళ్ళైనా సరిపోవురా”… అంటూ ‘సిసింద్రీ’ (1995)లో ఆమని, అఖిల్‌పై చిత్రీకరించిన ఈ పాట ఎప్పటికీ అజరామరమే. ఊహ తెలియని వయసులోనే ‘సిసింద్రీ’తో క్యూట్ హిట్‌ను తన సొంతం చేసుకున్నాడు అఖిల్. హాలీవుడ్ మూవీ ‘బేబీస్ డే అవుట్’కి రీమేక్‌గా రూపొందిన ఈ చిత్రంలో… తల్లీకొడుకులుగా ఆమని, అఖిల్ ప్రేక్షకులను కట్టిపడేశారు. కట్ చేస్తే… దాదాపు 24 ఏళ్ళ త‌రువాత మ‌రోసారి త‌ల్లీకొడుకులుగా ద‌ర్శ‌న‌మివ్వ‌నున్నారట‌ ఆమ‌ని, అఖిల్.

ఆ వివ‌రాల్లోకి వెళితే… ‘అఖిల్’తో హీరోగా ఎంట్రీ ఇచ్చిన అఖిల్‌… ఆ త‌రువాత‌ ‘హలో’, ‘మిస్టర్ మజ్ను’ సినిమాలతో ప్రేక్షకులను అలరించాడు. అయితే, హీరోగా ఫర్వాలేదనిపించుకుంటున్నా సాలిడ్ హిట్ అయితే మాత్రం ఇంకా అఖిల్ కెరీర్‌లో పడలేదు. ఈ నేప‌థ్యంలో… ప్రస్తుతం సెన్సిబుల్ డైరెక్టర్ ‘బొమ్మరిల్లు’ భాస్కర్ దర్శకత్వంలో ఓ సినిమా చేస్తున్నాడు అఖిల్. ఫ్యామిలీ ఎంటర్‌టైనర్‌గా రూపొందుతున్న ఈ చిత్రంలో… `బొమ్మ‌రిల్లు`లో జ‌య‌సుధ పోషించిన పాత్ర త‌ర‌హాలో పెర్‌ఫార్మెన్స్‌కి స్కోప్ ఉన్న అమ్మ పాత్ర ఒక‌టి ఉంద‌ట‌. ఆ పాత్ర‌లో అఖిల్‌కి ఆన్ స్క్రీన్ మదర్‌గా కలిసొచ్చిన ఆమని… హీరో త‌ల్లి పాత్ర‌లో క‌నిపించ‌నుంద‌ని స‌మాచారం. త్వ‌ర‌లోనే ఆమ‌ని ఎంట్రీపై క్లారిటీ వ‌స్తుంది.

మ‌రి… ఈ సారి ఎలాగైనా సాలిడ్ హిట్ కొట్టాలని మంచి పట్టుదల మీదున్న అఖిల్‌కు… ఆమని ఫ్యాక్ట‌ర్ ఎంత‌వ‌ర‌కు క‌లిసొస్తుందో చూడాలి.