ఏయ‌న్నార్ `బంగారు కుటుంబం`కి పాతికేళ్లు

న‌ట సామ్రాట్ అక్కినేని నాగేశ్వర రావు, ద‌ర్శ‌క‌ర‌త్న దాస‌రి నారాయ‌ణ రావు కాంబినేష‌న్ అంటేనే… ప‌లు క్లాసిక్ మూవీస్‌కి కేరాఫ్ అడ్ర‌స్‌. అలాంటి ఈ ఇద్ద‌రి కల‌యిక‌లో వ‌చ్చిన మ‌రో విజ‌యవంత‌మైన చిత్రం `బంగారు కుటుంబం`. మ‌ధ్య‌త‌ర‌గ‌తి కుటుంబ మ‌న‌స్త‌త్వాలు, కుటుంబ బంధాలు, మాన‌వ విలువ‌లు… వంటి అంశాల‌తో రూపొందిన ఈ ఫ్యామిలీ ఎంట‌ర్‌టైన‌ర్ బాక్సాఫీస్ వ‌ద్ద స‌క్సెస్‌ఫుల్ మూవీగా నిల‌చింది. అంతేకాదు… 1994కి గానూ `ఉత్త‌మ చిత్రం`గా `నంది` పుర‌స్కారాన్ని అందుకుంది. అలాగే… `ఉత్త‌మ న‌టుడు`గా ఏయ‌న్నార్‌కి `నంది` పుర‌స్కారాన్ని అందించింది.

ఏయ‌న్నార్‌కి జోడీగా జ‌య‌సుధ న‌టించిన ఈ చిత్రంలో విక్ర‌మ్‌, హ‌రీష్‌, రాజ్ కుమార్‌, రంభ‌, య‌మున‌, రాజీవి, కైకాల స‌త్య‌నారాయ‌ణ ఇత‌ర ముఖ్య పాత్రలు పోషించారు. రాజ్-కోటి స్వ‌ర‌సార‌థ్యంలో `అమ్మంటే ప్రేమ‌కు రూపం` పాట ప్ర‌జాద‌ర‌ణ పొందింది. ఫిబ్ర‌వ‌రి 18, 1994న విడుద‌లైన `బంగారు కుటుంబం`… నేటితో 25 వ‌సంతాల‌ను పూర్తిచేసుకుంటోంది.